Сонуннар

Боксердарбыт тустарыгар сутурукпутун ыга туттабыт

Хабаровскайга эр дьоҥҥо Россия чемпионата үгэннээн ыытылла турар. Эрдэ сырдаппыппыт курдук, анал сүүмэрдээһини ааһан бу эппиэттээх күрэхтэһиигэ Саха сириттэн 12 боксёр күүһүн холоһор. Бу кэмҥэ диэри сорохтор рингэҕэ саҥа тахсаллар, сорохтор номнуо иккис киирсиилэрэ.

Билиҥҥи туругунан 8 уолбут кииристэ. Кинилэртэн Николай Пшенников икки, Василий Егоров, Михаил Варламов, Рустам Туприн – биирдии кыайыылаахтар. Онтон Назар Андреев, Ян Алексеев, Рустам Дьяконов, Михаил Прокопьев хомойуох иһин хоттордулар.

Тумус туттар боксёрбут, спорт үтүөлээх маастара Василий Егоров бастакы утарсааччытын кыайбыта. Сэрэбиэй быһыытынан бэнидиэнньиккэ, иккис киирсиитигэр кини биир саамай кутталлаах утарсааччытын утары тахсар – аан дойду чемпионатын боруонса призера, Россия спартакиадатын кыайыылааҕа, норуоттар икки ардыларынааҕы кылаастаах спорт маастара Ахтем Закировы (Крым) кытта. Кинилэр сирэй көрсөн киирсиилэрин ахсаана 3:2, биһиги Василийбыт туһатыгар. Хаһан баҕарар Егоров – Закиров киирсиилэрэ наһаа сытыы, олус тыҥааһыннаах буолааччы. Биллэн турар, биһиги бэйэбит уолбут кыайарыгар эрэнэбит.

Закиров бэйэтэ бастакы кыайыытын кэнниттэн суруналыыстарга эппитинэн, наполеоннуу былааннаах, ол аата, бу чемпионакка хайаан да бастакы миэстэни ылан, эһиил ыытыллар Олимпиадаҕа Россия хамаандатыттан кыттыы. Дьэ, көрүөхпүт.

Бу кэмҥэ диэри боксёрдарбыт киирсиилэрэ:

Бастакы күн:

51 кг Василий Егоров – Артур Нагапетян (Москва) 5:0

60 кг Николай Пшенников – Иван Горда (С-Петербург) 5:0

80 кг Назар Андреев – Ильяс Магомедов (Дагестан) 1:4.

Иккис күн:

57 кг Михаил Варламов – Рафик Амирханов (Москва уоб.) 5:0

57 кг Ян Алексеев – Дмитрий Шиповскай (Севастополь) 0:5.

Үһүс күн:

48 кг Рустам Дьяконов – Адам Альвиев (Чечня) 0:5

48 кг Михаил Прокопьев – Гога Топурия (Ставрополь) 1:4

48 кг Рустам Туприн – Виталий Потапов (Свердловскай) 5:0

60 кг Николай Пшенников – Никита Петин (Москва) 2-с рауҥҥа быһа кыайыы.

Атырдьах ыйын 21 күнэ – эппиэттээх күн, рингэҕэ биэс боксербут тахсыаҕа. Ол курдук, чемпионат сарсыардааҥҥы чааһыгар Талбан Егоров (51 кг) – Россия чемпиона Расул Салиевтыын (Дагестан) киирсиэҕэ. Эмиэ ити ыйааһыҥҥа Николай Григорьев – Ислам Албасхановы (Чечны) утары тахсыаҕа. Айаал Степанов (54 кг) бастакы киирсиитин ыытыаҕа. Кини утарсааччыта – Максим Хариборко (Алтай).

Бу күн сүрүн киирсиитэ «Василий Егоров – Ахтем Закиров» чемпионат сарсыардааҥҥы чааһыгар Б рингэҕэ төрдүс пааранан буолуоҕа. Онтон чемпионат киэһээҥҥи чааһыгар биир эрэнэр киһибит Михаил Варламов – Юрий Двалины (Москва) кытта киирсиэҕэ.

Боксёрдарбытыгар ситиһиилээх кыттыыны баҕарабыт. Уонна боксёрдар этэллэринии, кинилэр тустарыгар сутурукпутун ыга туттабыт.

Чемпионат сарсыардааҥҥы чааһа Дьокуускай бириэмэтинэн күнүс 11:00, оттон киэһээҥҥитэ 16:00 чаастан саҕаланар.

Петр ПАВЛОВ.

Хаартыскаҕа: “Кыайыыны ситистэ Рустам Туприн”.

Добавить комментарий

Ваш адрес email не будет опубликован. Обязательные поля помечены *

141124
Бүгүн : 232