«Лыгый Куо оонньуулара» ыҥырар

Тапталлаах Сахабыт сиригэр самаан сайын сатыылаан, сир-сир ахсын саха төрүт үгэһинэн ыһыахтар ыытыллар кэмнэрэ үгэннээн турар. Биир оннук тэрээһин, бэс ыйын 17 күнүгэр Тулагы-Киллэм нэһилиэгэр буолар.

Ыһыах буолан баран, оонньуулаах-көтүүлээх, ким быһыйын, ким сымсатын, күүстээҕин быһаарар түһүлгэлээх буолар. Холобур, Тулагы-Киллэм ыһыаҕар спорт араас көрүҥэр күрэхтэһиилэр, илии-атах оонньуулара ыытыллыахтара.

Олортон биир, киһи кэрэхсиир күрэхтэһиитинэн – быһый, сымса кыргыттарга анаан «Лыгый Куо оонньуулара» буолуоҕа. Манна кыргыттар уонна эдэр дьахталлар күрэс былдьаһаллар. Күрэхтэһии сыала-соруга диэн чөл олохтоох, спорду сөбүлүүр кэрэ аҥардары өйөөһүн; тыа сирин олохтоохторун олоххо көхтөрүн үрдэтии; ыһыахха ыытыллар саха төрүт оонньууларын сөргүтүү, сайыннарыы буолар.

Күрэхтэһиигэ 18-40 саастаах быһый, сымса кыргыттар, эдэр дьахталлар, Тулагы-Киллэм нэһилиэгин олохтоохторо кытталлар.

Кинилэр сахалыы ох саанан ытыыга, Хомуурга (бириэмэҕэ оҕо оонньуур кубиктарын хомуйуу), 100 миэтэрэҕэ сүүруугэ, биир сиртэн уһуҥҥа ыстаныыга, 16 киилэлээх гиирэни икки илиитинэн тутан атаҕын икки ардыгар хачайдаан баран ыраахха быраҕыыга күрэхтэһиэхтэрэ.

Күрэхтэһии түмүгүнэн көрүҥ аайы – 1, 2, 3 миэстэни ылбыттар мэтээллэринэн, дипломнарынан наҕарааданаллар. Оттон уопсай түмүккэ 1-кы, 2-с, 3-с миэстэлэри ылбыттар – мэтээлинэн, дипломунан уонна сыаналаах бирииһинэн наҕараадаланыахтара. Сайаапканы ылыы: М.П. Обутова-Эверстова аатынан култуура киинэ. Б/т 207-138, 896567670976 (Александра Николаевна Харитонова) ватсап.

«Лыгый Куо» күрэхтэһиигэ көхтөөхтүк кыттаргытыгар ыҥырабыт.

Тэрийэр бөлөх.