Ил Дархан Кубога: Кыайыылаах – Дмитрий Кокарев

Дьокуускай. Тохсунньу 23 күнүттэн саҕаламмыт Ил Дархан Кубогар саахымакка күрэхтэһиитэ, атыннык эттэххэ эр дьоҥҥо Россия Кубогын иккис түһүмэҕэ түмүктэннэ. Манна дойду 12 регионуттан барыта 58 саахыматчыт күөн көрүстэ. Ол иһигэр алта международнай гроссмейстер кыттан, күрэхтэһиини киэргэттэ.

Бүтэһик туурдарга инники сылдьыбыт международнай гроссмейстер Дмитрий Кокарев (Свердловскай) ылбыт тэтимин ыһыктыбакка, күрэхтэһии кыайыылааҕынан буолла. Бүтэһик туурга кини эмиэ международнай гроссмейстер Алексей Придорожнайы кытта тэҥнэстэ. Онон барыта 7 очукуоланна.

Международнай маастар Алексей Гребнев (Самара) – международнай гроссмейстер Антон Шомоевы (Бурятия) кыайан, эмиэ 7 очукуоланна эрээри, хаачыстыбанан сабырыйтаран иккис миэстэлэннэ. Онтон международнай гроссмейстер Дмитрий Кряквин (Крым) – маастар Дмитрий Егоровтыын (Саха сирэ) тэҥнэһэн, 6,5 очукуолаах үһүс бириистээх миэстэни ылла.

Манна даҕатан эттэххэ, Алексей Придорожнай, маастар Олен Рычков (Хабаровскай) уонна биһиги Дмитрий Егоровпыт эмиэ 6,5-тии очукуону хомуйдулар уонна хаачыстыбанан көрүллэн, туһааннааҕынан төрдүс, бэһис, алтыс миэстэлэри ыллылар.

Турнир түмүгүнэн уон күүстээхтэр кэккэлэригэр 6-лыы очукуолаах Антон Шомоев, Владислав Жирков (Саха сирэ), Баира Кованова (Саратов) уонна Айсен Местников (Саха сирэ) киирдилэр.

Кыайыылаах Дмитрий Кокоревка чороон, кыһыл көмүс мэтээл уонна 250 тыһ. солк. харчынан бириис туттарылынна. Иккис миэстэлээх Алексей Гребнев чороонунан, үрүҥ көмүс мэтээлинэн уонна 200 тыһ. солк. харчынан наҕараадаланна. Үһүс буолбут Дмитрий Кряквин чороонунан, боруонса мэтээлинэн уонна 150 тыһ. солк. харчы бирииһинэн бэлиэтэннэ.

Сүрүн кыайыылаахтарга бириистэри Саха Республикатын Правительствотын председателин солбуйааччы Сергей Местников туттарда.

Ити курдук, 4-тэн 10-ка диэри миэстэни ылбыт саахыматчыттар эмиэ наҕараадаҕа тигистилэр.

«Дьулурҕан».

Анастасия Рыжикова («Мой спорт») хаартыската.