Эрхан Бысыин саҥа көрүҥҥэ холонно

Россия 2024 с. Ски-альпинизмҥа (олимпийскай көрүҥ) чемпионата Кабардино-Балкарияҕа, Эльбрус хайатыгар турар Терсколга ыытылынна. Икки күн устата ыытыллыбыт чемпионакка саха уола, Россия икки көрүҥҥэ спордун маастара, дойду альпинизмҥа хамаандатын чилиэнэ Эрхан Бысыин кыттыыны ылла.

Эрхан бу адьас саҥа көрүҥҥэ Краснодарскай кыраай хамаандатын састаабыгар кытынна. Бу аналлаах хайыһарынан сүүрүүгэ туспа бэлэм, анал инвентарь ирдэнэр көрүҥэ. Олимпийскай оонньууларга саҥа киирбит буолан – ирдэбилэ, күрэхтэһии таһыма олус күүстээх.

Ол курдук, хайаттан түһүүгэ, спортсменнар чааска 110-130 км түргэннээх тэтиминэн түһэллэр. Хайаны дабайыы ирдэбилэ эмиэ ураты. Олус элбэх бириэмэни хонтуруоллуур тиһилик бөҕө, кыра да сыыһа-халты туттуу иһин трассаттан устан иһэллэр. Судьуйалар бары тустаах көрүҥҥэ анаан бэлэмнээхтэр, норуоттар икки ардыларынааҕы кылаастаахтар.

Бастакы күн “туруору километр” (вертикальный километр) күрэхтэһиигэ 57 спортсмен стартаата. Бу көрүҥҥэ Эрхан 14-с миэстэ буолла. Иккис күн “индивидуальная гонка” диэҥҥэ эмиэ 57 спортсмен күрэхтэстэ. Уолбут бу көрүҥҥэ 10-с буолан, Россия уон бастыҥын иһигэр киирдэ.

Эрхан бэйэтэ этэринэн, бу көрүҥҥэ үс ый эрэ дьарыктаммыт, инвентарь элбэҕи быһаарар диир.

“Дьулурҕан”.