Кузьма Сивцев: “Спонсордарбытыгар барҕа махтал!”

Атырдьах ыйын 16-20 күннэригэр республикабыт киин куоратыгар көҥүл тустууга сахалартан аан дойду бастакы чемпиона Илларион Федосеев сырдык аатыгар анаммыт «Боотурдар оонньуулара» республикатааҕы фестиваль ыытыллан түмүктэннэ.

Хапсыһыылар «Модун» спортивнай комплекска, В.П. Керемясов аатынан куорат 3 №-дээх спортивнай оскуолатын тустууга саалатыгар уонна Дьокуускай 25 №-дээх оскуолатыгар, туһааннаах тэрилтэлэр көмөлөрүнэн бэрт тэрээһиннээхтик ыытылыннылар.

Күрэхтэһии түмүгүн туһунан Саха Республикатын оҕолорго хамаандатын сүрүн тренерэ, Россия спордун норуоттар икки ардыларынааҕы кылаастаах спордун маастара, Саха сирин хапсаҕайга маастара Кузьма Сивцев санаатын маннык үллэһиннэ:

–Көҥүл тустууга “Боотурдар оонньуулара” 2000 сыллаахтан биһиги бастакы президеммит Михаил Ефимович Николаев быһаччы көҕүлээһининэн ыытыллыбыта. Итинтэн ыла тиһигин быспакка тэриллэр.

Быйылгы күрэхтэһии саастарынан араарыллыбыт түөрт бөлөҕүнэн (2009-2010, 2007-2008, 2011-2012, 2013-2014 сс. төрөөбүттэр) ыытылынна. Маны биһиги наадалааҕынан ааҕабыт. Тоҕо диэтэххэ, быйыл сайын сир-сир аайы тустууга аналлаах спортивнай лааҕырдар аһыллан үлэлээтилэр. “Боотурдар оонньуулара” олор үлэлэрин түмүгүн көрүү курдук буолла. Онон түөрт бөлөҕүнэн барыта 791 оҕо көбүөргэ таҕыста. Бу күрэхтэһииттэн саҕалаан элбэх оҕо бэйэтигэр, салгыы тустуунан дьаныардаахтык дьарыктанарга эрэл ылар. Ону биһиги спорпут уонна тустуубут салалталара сөптөөхтүк өйдөөн, болҕомто уураллара кэрэхсэбиллээх.

Быйылгы “Боотурдар оонньууларыгар” Харбалаахтааҕы “Төлөн” чох разреһа (генеральнай дириэктэр Прокопий Дмитриевич Рахлеев) 200 тыһ. солк. бириискэ анаан туруорбутун, кыайыылаах оҕолорго туттардыбыт. Онтон эмиэ Тааттаттан төрүттээх хапсаҕай маастара Петр Табунанов бэйэтин аатыттан 5 тыһ. солк. харчынан бирииһин кыра саастаахтар бөлөхтөрүн бастыҥнарыгар анаатыбыт. Түгэнинэн туһанан, спонсордарбытыгар барҕа махтал!

Салгыы үлэбитин билиһиннэрдэххэ, балаҕан уонна алтынньы ыйдарыгар анал үөрэтэр-эрчийэр түмсүүлэри тэрийэр былааннаахпыт. Эһиил буолуохтаах «Азия оҕолоро» норуоттар икки ардыларынааҕы спортивнай оонньууларга хамаанданы бэлэмниибит. Итини тэҥэ, Нальчикка уонна Москва уобалаһыгар буолуохтаах уолаттарга Россия күһүҥҥү күрэхтэһиилэригэр бэлэмнэнэбит.   

Петр Павлов.