Дуобат федерацията 2023 сыл түмүгүнэн бастыҥнары бэлиэтээтэ

Дьокуускай. «Сэргэлээх уоттара» култуура киинигэр Саха сирин дуобакка федерациятын 2023 сылы түмүктүр үөрүүлээх тэрээһинэ буолла. Манна дуобат көрүҥүн салайааччылара, тренердэр, спортсменнар, суруналыыстар, күүс-көмө, өйөбүл буолар тэрилтэлэр кыттыыны ыллылар.

Дуобат федерацията – республикаҕа биир үчүгэй үлэлээх федерациянан биллэр. Билэргит курдук, биһиги спортсменнарбыт сыллата Россия, Европа, аан дойду чемпионаттарыттан, күрэхтэһиилэриттэн, норуоттар икки ардыларынааҕы турнирдартан элбэх ахсааннаан араас күлүмэрдэс өҥнөөх мэтээллэри, кубоктары ылары ситиһэн, этэргэ дылы дойдуларыгар сүгэн-көтөҕөн кэлэллэр.

Кырдьык, ылан көрдөххө, спорт ханнык да көрүҥнэриттэн дуобатчыттар Сахаларын сиригэр саамай элбэх мэтээли аҕалааччыларынан буолаллар. Саастарынан араарыллыбыт араас күрэхтэһиилэргэ өрүү ситиһиилээхтик кытталларын таһынан, спорт сайдыытыгар айымньылаахтык сыһыаннаһаллар. Ол курдук, муус устарга «Өрөгөй» Спорка бэлэмнэнии киинигэр Саха сиригэр физическэй култуура хамсааһынын 100 сыллаах үбүлүөйүгэр анаан гроссмейстердар 500 дуоскаҕа сеанстара тэриллибитэ. Аны ахсынньы аам-даам тымныытыгар «Үрдэл» пааркаҕа 40 кыраадыс тымныыга аһаҕас халлаан аннынан оонньуу тэриллибитэ. Аҥардас бу, киһи сүргэтин көтөҕөр ураты тэрээһиннэр – дуобат федерациятын 2023 сылга бэлиэ, өйгө-санааҕа хатанан хаалар тэрээһиннэринэн буолаллар.

Үөрүүлээх тэрээһиҥҥэ Дуобат республикатааҕы уонна аан дойдутааҕы федерацияларын бочуоттаах президенэ Владимир Ильич Птицын, дуобатчыттар өрүү буоларыныы ааспыт сылы эриэ-дэхси көрдөрүүлээх түмүктээбиттэрин, улахан таһымнаах күрэхтэһиилэргэ дьоһун кыайыылар ситиһиллибиттэрин, гроссмейстердар, маастардар кэккэлэрэ кэҥии турарын бэлиэтээтэ уонна үүммүт сылга ылыллыбыт тэтими ыһыктыбакка салгыы өссө дьаныардаахтык дьарыктанан, кыайыылар-хотуулар кэлэр туралларыгар баҕарда.

Итиэннэ дуобат федерациятын кытта биир санаанан күүс-көмө буолан үлэлиир тэрилтэлэр салайааччыларыгар федерация махтал суруктарын үөрүүлээх быһыыга-майгыга туттартаата.

Саха Республикатын дуобакка федерациятын президенэ Руслан Михайлович Платонов бэйэтин үлэтинэн билигин дойду тэбэр сүрэҕэр – Москва куоракка сылдьан үөрүүлээх тэрээһин кыттыылаахтарын эҕэрдэлээһинэ аныгы сибээс көмөтүнэн сыанаҕа тыктарыллан көрдөрүлүннэ.

Онтон СР дуобакка федерациятын вице-президенэ, СР физическэй култуураҕа уонна маассабай спорка управлениетын начаалынньыгын солбуйааччы, гроссмейстер Иван Августович Токусаров – 2023 сылга үрдүк көрдөрүүлэри ситиһэн, бэйэлэрин оонньуур таһымнарын үрдэппит дуобатчыттарга анал бэлиэлэри туттарда. Ол иһигэр, международнай гроссмейстер Николай Гуляевка – Россия гроссмейстерэ буолбутун туоһулуур түөскэ анныьыллар бэлиэ уонна дастабырыанньа туттарылынна.

Бу киэһэ анал номинациялар бастыҥнарыгар, үрдүк ситиһиилээх чулуу спортсменнарга, тренердэргэ, өйдөбүнньүк бэлэхтэр туттарылыннылар. Ол курдук, Саха Республикатын дуобакка федерациятын вице-президенэ, М.К. Аммосов аатынан Хотугулуу Илиҥҥи федеральнай университет физическэй култуураҕа уонна спорка институтун интеллектуальнай спорт көрүҥнэригэр отделын начаалынньыга, Саха сирин физическэй култуураҕа уонна спорка туйгуна Юрий Егорович Никифоров; спорт бэтэрээнэ, Саха сирин 13 төгүллээх чемпиона, РСФСР чемпионатын боруонса призера, ССРС чемпионатын кыттыылааҕа, Саха Республикатын норуотун хаһаайыстыбатын үтүөлээх үлэһитэ Николай Николаевич Саввинов; дуобакка международнай арбитр, Саха Республикатын физическэй култууратын уонна спордун үтүөлээх үлэһитэ, Россия норуотун үөрэҕириитин туйгуна, Мэҥэ Хаҥалас улууһун бочуоттаах гражданина Дмитрий Васильевич Сыромятников – «Дуобат спорда сайдыытыгар кылааттарын иһин» диэн номинация лауреаттарынан ааттанан, СР дуобакка федерациятын вице-президенэ Иван Августович Токусаров илиититтэн өйдөбүнньүк бэлиэлэри туттулар.

Үөрүүлээх киэһэ ылбаҕай ырыалаах, имигэс үҥкүүлээх арыалланна, иллюзионист Алексей Гольдеров бэйэтин дьикти дьоҕурунан дьону сэргэхситтэ.

Петр ПАВЛОВ.

Ааптар хаартыскаҕа түһэриитэ.