Оҕолор хомуур хабылыкка күрэхтэстилэр

Хабылыктаан хаптайдылар,

Хары хабыстылар,

Хапса оонньоотулар,

Харса суох үөрдүлэр… 

Өксөкүлээх Өлөксөй.

А.Г. уонна Н.К. Чиряевтэр ааттарын сүгэр Дьокуускай куораттаҕы Саха национальнай гимназиятын алын сүһүөх кылаастарыгар быйыл иккис сылын «Хомуур хабылык» ыытылынна. Бу тэрээһин остуол төрүт оонньуутун – хабылыгы алын сүһүөх кылааска үөрэнэр бары үөрэнээччилэргэ киэҥник тарҕатар, оҕо бары хабылыгы оонньуур сатабылын сайыннарар сыаллаах ыытыллар.

Ол курдук, алын кылааска үөрэнэр 415 оҕо бары хабыллан оонньуур. Тэрээһин үөрэх сылын устата хас да түһүмэҕинэн ыытыллар. Бастыҥтан бастыҥ оонньооччулар куорат оскуолаларын икки ардыгар ыытыллар турнирдарга кытталлар.

Алын сүһүөх учууталларын холбоһуга быйыл иккис төгүлүн Өксөкүлээх Өлөксөй аатынан Норуоттар доҕордоһууларын дьиэтин информационнай-маркетинговай салаатын салайааччытын Л.Е. Шишигиналыын сүбэлэрин холбоон бэрт тэрээһиннээх күрэҕи ыыттылар. Былырыын куорат 14 оскуолаларыттан 115 оҕо, быйыл 12 оскуолаттан – 151 оҕо кыттыны ылла. Быйылгы күрэххэ хаамаанданан түмүккэ ЯГНГ алын сүһүөх кылаастарын хамаандата 1-кы миэстэҕэ, Айыы кыһата оскуола 2-с миэстэҕэ, Н.О. Кривошапкин аатынан 5 №дээх оскуола 3-с миэстэҕэ тахсары ситистилэр.

Хабылык, хаамыска оонньуу нөҥүө оҕолор атын сахалыы оонньуулары интэриэһиргииллэрэ кэрэхсэбиллээх. Ол курдук, быйылгы күрэх уратыта – төрүт оонньуулартан «Кириэс тэбии», «Тутум эргиир» курдук уустук көрүҥнэр киириилэрэ буолар. Төрүт хамсаныылар оҕо эт-хаан өттүнэн сайдыытыгар көдьүүстээҕин уонна билиҥҥи кэмҥэ бу оонньуулары сайыннарар, тарҕатар тоҕоостооҕун учууталлар төрөппүттэр бэлиэтээтилэр.

Үгэс быһыытынан сылын ахсын гимназия сирэм күөххэ үктэммиччэ самаан сайыны айхаллыыр түһүлгэни тэрийэр. “Хомуур хабылык”программаҕа киирэн, оҕолуун-төрөппүттүүн бу оонньууга кылаастар хамаанда туруоран кытталлар. Быйылгы оонньууга 146 киһи кыттыыны ылла. Ол иһиттэн 98 оҕо, 48 төрөппүт. Уопсай түмүккэ 4 «Б» кылаас бастакы миэстэҕэ таҕыста, иккис миэстэни – 4 «А», 2 «А» кылаастар, үһүс миэстэни – 2 «Г», 3 «А», 4 «В» кылаастар ыллылар. Маны тэҥэ биирдиилээн кылаас уопсай түмүгэр элбэх хабылыгы хаппыт оҕолор бэлиэтэннилэр уонна төрөппүттэр туруорбут бириистэрин туттулар: Сергеева Дайаана (1 «Б»), Слепцов Тимур (1 «А»), Винокурова Диана (2 «Г»), Ионова Ангелина (3 «А»), Соловьева Люба (2 «А»), Каратаев Марат (3 «В»), Габышев Эрхан (1 «А»), Уранаев Сахаян (4 «Б»), Кириллин Эрчим (4 «А»), Сидорова Сандаара (4 «Б»), Тимофеев Тимир (2 «В»).

Төрүт оонньууларбыт – хабылык, хаамыска суолталара улахан: оҕоҕо тулууру, дьулууру  иҥэрэр, сымсатык, имигэстик хамсанарга, түргэн толкуйдаах, булугас өйдөөх буоларга үөрэтэр. Маны тэҥэ тарбахтар хамсаныыларын түмүгэр мэйии былчыҥнарын үлэтэ  күүhүрэр, оҕо толкуйдуур дьоҕура сайдар, кини кыра сааhыттан дэгиттэр сайдыылаах  буола улаатарыгар олук  уурар.

Онон өбүгэлэрбититтэн бэриллибит сахалыы төрүт оонньуубутун хабылыгы оскуолаларга киэҥник тарҕатыахха, үөрэтиэххэ, салгыы сайыннарыахха!

Надежда БЕЛОЛЮБСКАЯ, Манчаары аатынан спорт төрүт көрүҥнэригэр республикатааҕы киин сахалыы остуол оонньууларыгар тренерэ.