Сонуннар

Айаал Лазарев – Кожомкул турнирыгар

Бэс ыйын 3-4 күннэригэр Кыргызстан Республикатын киин куоратыгар – Бишкеккэ, көҥүл тустууга Кожомкул аатынан норуоттар икки ардыларынааҕы турнир – Тустуу аан дойдутааҕы холбоһугун (UWW) көҕүлээһининэн рейтиннээх турнир быһыытынан ыытыллар.

Көҥүл тустууга күрэхтэһиини бастаан 97 уонна 125 кг ыйааһыннаахтар саҕалыыллар. Кинилэр сарсын, бэс ыйын 3 күнүгэр тусталлар уонна ити күн кыайыылаахтар быһаарыллаллар. Хаалбыт ыйааһыннарга хапсыһыылар бэс ыйын 4 күнүгэр саҕаланаллар уонна ити күн түмүктэнэллэр.

Бүгүн бары ыйааһыннарга сэрэбиэй буолла. Бу түһүлгэҕэ саха тустууга кыһатыттан – Азия чемпиона, аан дойду биирдиилээн бастыыр иһин Кубогын призера, икки Олимпиада кыттыылааҕа Айаал Лазарев кыттар.

125 кг барыта 15 кыттааччы баар эбит. Сэрэбиэй быһыытынан биһиги бөҕөспүт бастаан китаец Русиданмуну кытта тустар. Онно кыайдаҕына, финал чиэппэригэр узбек Холматовы кытта киирсиэҕэ. Бу бөлөххө күүстээхтэртэн, аан дойду чемпионатын призера монгол Мунхтур баар.

Оттон аллараа бөлөххө китаец Денг, грузин Петриашвили, поляк Баран, казах Батырмурзаев, узбек Рахимов курдук биллэр-көстөр бөҕөстөр бааллар.

Эппиппит курдук, Айаал Лазарев сарсын тустар. Уолбутугар ситиһиини баҕарабыт!

«Дьулурҕан».    

Добавить комментарий

Ваш адрес email не будет опубликован. Обязательные поля помечены *

186585
Бүгүн : 289