Уус Алдан – чемпион!

Аллараа Бэстээххэ (Мэҥэ Хаҥалас) Тимир Пинегин аатынан «Парус» спортивнай комплекска, мини-футболга Саха Республикатын 2023 сыллааҕы бастакы лигаҕа чемпионата ыытыллан түмүктэннэ. Манна сүүмэрдээһини ааспыт уон бастыҥ хамаанда кытынна.

Бүтэһик күҥҥэ быһаарыылаах оонньуулар буоллулар. Бастакынан Мэҥэ Хаҥалас уонна Дьокуускай хамаандалара үһүс миэстэни хайалара ыларын быһаарыстылар. Онуоха дьиэлээхтэр 4:2 ахсаанынан кыайыыны ситистилэр.

Дьэ, ол кэнниттэн тута аны ким бастыҥ буоларын иһин Уус Алдан уонна Мирнэй хамаандалара оонньоотулар. Бу киирсии эмиэ 4:2 ахсаанынан, уус алданнар тустарыгар түмүктэннэ. Кыайыылаахтарга голлары киллэрдилэр: Домотов (24-с мүн), Федоров (35-с уонна 50-с мүн), Жирков (49-с мүн), оттон мирнэйдэргэ – Никитин (40-с мүн) уонна Мартынов (50-с мүн).

Онон Уус Алдан бастакы, Мирнэй иккис, Мэҥэ Хаҥалас үһүс, Дьокуускай төрдүс миэстэлэри ыллылар. Манна даҕатан эттэххэ, былырыын Бороҕоҥҥо, Саха сирин норуоттарын спортивнай оонньууларыгар бириистээх миэстэ иһин эмиэ бу хамаандалар оонньообуттара. Онно түмүк маннык буолбута: бастакы Уус Алдан, иккис Дьокуускай, үһүс Мэҥэ Хаҥалас, төрдүс Мирнэй. Итинэн уус алданнар былырыын бастааһыннара соһуччу буолбатаҕын дакаастаан, республикаҕа бастыҥ буолалларын өссө төгүл итэҕэттилэр.

Кыайыылаах хамаанда састааба: Сергей Аманатов, Гаврил Портнягин, Андрей Иванов, Валентин Слепцов, Родион Иванов, Афанасий Домотов, Владимир Жирков, Егор Тролуков, Семен Афанасьев, Николай Федоров, Дьулустан Петров, Петр Кулаковскай, Афанасий Федоров.

Тренердэр: Сергей Скрябин, Василий Федоров, Василий Макаров, хамаанда начальнига – Степан Васильев.

Чемпионат түмүгүнэн бастыҥ оонньооччуларга анал бириистэр туттарылыннылар. Ол курдук, «Бастыҥ кимээччинэн» – Рустам Ларионов (Мэҥэ Хаҥалас), «Бастыҥ көмүскээччинэн» – Андрей Иванов (Уус Алдан), «Бастыҥ оонньооччунан» – Афанасий Федоров (Уус Алдан), «Бастыҥ бомбардирынан» – Владимир Потапов (Ленскэй), «Бастыҥ вратарынан» – Василий Мартынов (Мирнэй) буоллулар.

«Дьулурҕан».