Бэһэлэйдээх Болуодьалыын көрсүһүү

Саха бастакы көлүөнэ тустууктарын өрүү сүгүрүйэ, ытыктыы көрсөбүн. Спорт бу көрүҥэр туох баар улахан ситиһиилэр кинилэртэн сыһыаннаахтар, кинилэртэн тутулуктаахтар. Тоҕо диэтэргит, кинилэр – биһиги республикабытыгар тустуу сайдыытыгар бастакы акылааты уурбут дьоннор. Тустууга тапталы кинилэр иҥэрбиттэрэ. Сахалар тустууга ситиһиилэнэрбитигэр бастакы кыымы кинилэр сахпыттара…

Биир үтүө күн «Өрөгөй» Спорка бэлэмнэнии киинигэр тиийэ сылдьан соһуччу саха бастакы көлүөнэ тустууктарыттан биирдэстэрэ Владимир Дмитриевич Даниловы көрсө тустум. Истиҥник илии тутуһааппын кытта кырдьаҕаһым хап сабар суумкатыттан хаартыска таһааран көрдөрдө, онтуката өссө быһаарыы суруктаах.

Билэргит курдук кини кэнники кэмҥэ “Бэһэлэйдээх Болуодьа” диэн олоҥхоһут, олоҥхону айааччы, алгысчыт быһыытынан биллэр.

Бу  хаартыскаҕа, 2019 сыллаахха Крымҥа ыытыллыбыт фольклористар норуоттар икки ардыларынааҕы куонкурустарыгар Бэһэлэйдээх Болуодьа алгыстыыр кэмигэр Үөһээ Айыылар сэҥээрэн, бэйэлэригэр чугастык ылынан күн сардаҥатын ыыппыттар. Ити кини алгыһа күүстээҕин, айылҕалыын сибээстээҕин көрдөрөр.

Санатан эттэххэ, Владимир Данилов – көҥүл тустууга сахалартан ССРС спордун ахсыс маастара. РСФСР чемпионатын үрүҥ көмүс призера (1964), Дальнай Восток уонна Сибиир зонатын икки төгүллээх кыайыылааҕа (1960, 1963), Саха сирин үс төгүллээх чемпиона (1960, 1961, 1966), “Динамо” общество көҥүл тустууга уонна самбоҕа элбэх төгүллээх чемпиона, самбоҕа уонна слада тустууга аан дойдутааҕы күрэхтэһиилэр кыайыылаахтара уонна призердара.

Итини тэҥэ кини хапсаҕайга Саха АССР спордун маастара. ССРС физическэй култуураҕа уонна спорка туйгуна, Сунтаар улууһун бочуоттаах гражданина. Билигин 89 сааһыгар сылдьар.

Биһиги ытыктыыр, сүгүрүйэр киһибитигэр Владимир Дмитриевич Даниловка – Бэһэлэйдээх Болуодьаҕа кытаанах доруобуйаны баҕарабыт. Итиэннэ саха фольклорун, олоҥхотун, тойугун, алгыһын ыччаттарга тиэрдэ, үөрэтэ-такайа сылдьарыгар махтанабыт!

Петр Павлов.