Кыайыылаахтар быһаарылыннылар

Чурапчы улууһугар нэһилиэктэр икки ардыларынааҕы комплекснай спартакиада быйыл тэрээһиннээхтик, олус хатыһыылаахтык барда. Күрэхтэһии барыта 19 көрүҥҥэ ыытылынна. Тиһэх – национальнай многоборье күрэһэр диэри бириистээх миэстэҕэ тиксэр иһин илин-кэлин түсүһүү уҕараабата.

Быйылгы спартакиада Саха Өрөспүүбүлүкэтигэр физкультурнай хамсааһын 100, ССРС физическэй култуураҕа туйгуна, Саха АССР култууратын үтүөлээх үлэһитэ, “Урожай” ДСО Бочуоттаах чилиэнэ Афанасий Кирикович Софронов төрөөбүтэ 95 сылыгар ананна.

Ахсынньы 6-7 күннэригэр А.И. Федотов аатынан спортивнай кииҥҥэ национальнай многоборьеҕа күрэхтэһиигэ 14 нэһилиэктэн дэгиттэр сайдыылаах спортсменнар ким бастыҥын быһаарыстылар.

Күрэхтэһиини үөрүүлээхтик аһыыга улуус баһылыга Степан Саргыдаев, улуус мунньаҕын председателэ, спорт национальнай көрүҥнэригэр федерациятын салайааччыта Яков Оконешников, ЧГФКСИ президенэ Михаил Гуляев кыттыыны ыллылар, эҕэрдэ тыл эттилэр.

Хас биирдии кыттааччыны нэһилиэк баһылыктара арыаллаан киллэрдилэр.

Бастакы “Үс төгүл үс” ыстаныыга Соловьев нэһилиэгин ыччата Михаил Соловьев тэҥнээҕин булбата. Иккиһи Кытаанах нэһилиэгиттэн Петр Бабиченко, үсүһү Арыылаахтан Андрей Пугачев ыллылар.

Тутум эргииргэ Юрий Копырин (Төлөй) 55-тэ эргийэн бастаата, иккиһи 50 эргиири оҥорбут Станислав Андросов (Хадаар), үсүһү 46 эргиирдээх Айсен Елисеев ыллылар.

Мас тардыһыытыгар Станислав Андросов бастаата, иккиһи Андрей Пугачев, үсүһү Болтоҥоттон Иннокентий Попов ыллылар.

ЧГФКСИ манеһыгар буолбут 400 м сүүрүүгэ Михаил Соловьев 59,10 сөк. кэлэн бастаата, Юрий Копырин 59,50 сөк. көрдөрүүлээх иккис, Мугудайтан Константинов Евсеев 1 мүн. 01 сөк. көрдөрүүлээх үһүс миэстэни ыллылар.

Далла мэндэһиигэ куобаҕы, куһу табыыга Георгий Пугачев (Дириҥ) тэҥнээҕин булбата. Иккис – Андрей Пугачев, үһүс – Роберт Тарабукин (Бахсы).

Хапсаҕайга чемпион үрдүк аатын Юрий Копырин ылла. Иккис миэстэ Андрей Пугачев буолла, үһүс – Айсен Елисеев (Алаҕар).

Ыараханы көтөҕүүгэ 100 кг кумахтаах куулу ыраахха илдьиигэ кииристилэр. Маныаха Юрий Копырин 225 м тиэрдэн бастаата, иккиһи 211 миэтэрэ көрдөрүүлээх Айсен Елисеев, үсүһү 180 м тиэрдибит Станислав Андросов ыллылар.

Икки күннээх күүрээннээх күрэхтэһии түмүгэр уопсай түмүккэ Юрий Копырин бастаата, Андрей Пугачев иккис, Георгий Пугачев үһүс буоллулар.

Комплекснай спартакиада түмүктэннэ. Бастакы бөлөххө (улахан нэһилиэктэр) Чурапчы бастаата, Болугур иккис, Хоптоҕо үһүс буоллулар. Иккис бөлөххө – бастакы Хадаар, Төлөй иккис, Кытаанах үһүс.

Алексей СЛЕПЦОВ.

Чурапчы.