«Лыгый Куо-2023» кыайыылааҕа – Иванна Ильина

Эрдэ иһитиннэрбиппит курдук Тулагы Киллэм нэһилиэгин ыһыаҕын кэмигэр кэрэ куоларга «Лыгый Куо-2023» күрэхтэһии ыытылынна. Бу сырыыга күрэхтэһиигэ 20-тэн 37-гэр диэри саастаах сэттэ спортсмен кытынна.

Ол курдук – Екатерина Нектегяева, Ариадна Атласова, Улита Захарова, Иванна Ильина, Надежда Васильева, Мария Васильева, Алина Жегусова күрэс былдьастылар.

Күрэхтэһии биэс көрүҥҥэ ыытылынна. Онуоха Хомуурга уонна гиирэни кыыратыыга Надежда Васильева, ыстаныыга уонна сүүрүүгэ Иванна Ильина, оҕунан ытыыга Алина Жегусова бастаатылар. Түмүккэ, кылаабынай судьуйа Виктория Романовна Дьячковская быһаарыытынан «Лыгый Куо-2023» кыайыылааҕынан 10 очукуолаах Иванна Ильина таҕыста. Иккис миэстэни киниттэн биир очукуонан хаалан, Алина Жегусова ылла. Үһүс бириистээх миэстэҕэ 17 очколаах Надежда Васильева тигистэ.

Кыайыылаах Иванна Ильина «Драгоценности Якутии» тэрилтэ (салайааччы В.Р. Кычкин) олохтообут сыаналаах бирииһинэн наҕараадаланна.

Көрөөччүлэр да, кыттааччылар даҕаны бу күрэхтэьиини сүрдээҕин сөбүлээтилэр, эһиил эмиэ ыытылларыгар баҕардылар.

«Дьулурҕан».