Коркин-2023: Никита Софронов күрэхтэһиини кыайыынан саҕалаата

“Өрөгөй” Спорка бэлэмнэнии киинигэр улуу тренер Д.П. Коркин кэриэһигэр көҥүл тустууга норуоттар икки ардыларынааҕы турнир саҕаланна. Билигин бары ыйааһыннарга бастакы эргиир ыытылла турар.

Турнир номнуо соһуччу түкүмтэр бааллар. Ол курдук, Улугбек Жолдошбеков, Никита Сучков курдук биллиилээх бөҕөстөр бастакы киирсиилэригэр хоттордулар.

Онтон Саха сирин чемпиона Никита Софронов (92 кг) бастакы көрсүһүүтүгэр Россия чемпионатын, И.Ярыгин турнирын призера Гурам Черткоевы ыраастык кыайан, көрөөччүлэри үөртэ. Маҥнай кини 3:8 хотторон испитэ ээ, онтон иккис түһүмэххэ киирэн киһитин быһан кэбистэ, 13:8 ахсаанынан кыайан иһэн, ыраастык уурда.

Уолбут аныгыскы эргииргэ А.Багаевы (ХМАО) кытта тустар.

Бу Черткоевка урут Ньургун Сергин хаста да хотторон турар.

Петр Павлов.

Ааптар хаартыскаҕа түһэриитэ.