Сонуннар

Художественнай гимнастикаҕа маҥнайгы аһаҕас турнир ыытыллыа

Хас биирдии оҕо кыра эрдэҕиттэн ханнык көрүҥҥэ дьоҕурдааҕын көрөн, сөптөөх дьарык ыытан инникитин спорт эйгэтигэр буһан-хатан спортсмен быһыытынан үүнэн-сайдан тахсарыгар сүҥкэн оруоллаах.

Биһиги Ньурбабыт улууһугар художественнай гимнастика көрүҥэ оҕону уһуйаан сааһыттан дьарыктаан, 2021 сылтан Мария Алексеевна Александрова салалтатынан үлэлиир.

Мария Алексеевна бэйэтэ Антоновкатааҕы оҕону сайыннарар киин “Ромашка» уһуйаанын иитээччитинэн үлэлиир. Номнуо икки сыл иһигэр кырачаан спортсменнарбыт ситиһиилэрэ үгүс. Бу художественнай гимнастика көрүҥэ төрөппүттэр, дьарыктанар оҕолор, улуус салатата болҕомтолорун, интэриэстэрин тардан улууспут иһигэр бу көрүҥҥэ федерация тэриллэн, бу дьыл муус устар ый 2 күнүгэр оройуоннааҕы художественнай гимнастикаҕа маҥнайгы аһаҕас турнир ыытыллары турар. Федерация салайааччытынан Валерия Гаврильевна Владимирова үлэлиир.

Биһиги улууспутугар биир олимпийскай көрүҥнэртэн биирдэстэрэ художественнай гимнастиканы салайан ыытар тренер-преподаватель Мария Алексеевнаны көрсөн, санаатын иһиттибит:

-Мин маҥнай 2021 сыл сэтинньи ыйга “Авокадо” оҕону эбии дьарыктааһыҥҥа ритмика куруһуогун үлэлэтэн саҕалаабытым. Онтон муус устар ыйга Хаҥалас улууһугар художественнай гимнастикаҕа күрэхтэһии буоларын истэн, онно оҕолорбун бэлэмнээн кыттыыны ылан, устунан бу көрүҥү сөбүлээн дьарыктаан барбытым

Бастаан саҕалыырбар 30 иитиллээччилэрдээх буоллахпына, күн бүгүн 100 оҕо дьарыктанар, биир көмөлөһөөччү тренердээхпин. Икки сыл иһигэр Дьокуускай куоракка – 5, Покровскайга – 1, Московскай уобалас Одинцово куоратыгар ыытыллыбыт “Зимняя сказка”, Москва куоракка буолбут “Грация” күрэхтэһиилэргэ кыттыыны ыллыбыт, 30 оҕом иккис уонна үһүс юношескай спортивнай разрядтары толордулар. Былырыын Александра Андреевна Бронских уонна Татьяна Кирилловна Шишигина салаталаах Ньурбаҕа сүүмэрдиир дьарыктар ыытыллыбыттара. Бу дьыл кулун тутар ыйга ССРС спордун маастара, республикабыт художественнай гимнастикаҕа сүүмэрдэммит хамаандатын тренерэ Татьяна Кирилловна Шишигина салалтатынанан ыытылынна

Сорох оҕолор айылҕаттан имигэс, сорохтор наһаа баҕалаах дьаныардаахтык дьарыктанан ситиһии үктэлин дабайар оҕолор бааллар. Онтон мин хас биирдии иитиллээччилэрим кыра да күннээҕи ситиһиилэриттэн сүрдээҕин үөрэбин, саамай сатаабат оҕо кэлэн сатаатаҕына, бу мин үлэм түмүгэ – диэн икки бүк үөрэбин. Инникитин өссө сайдан, элбэх оҕону хабан, кэҥээн үлэлиир баҕалаахпын. Үгүс улахан первенстволарга кыттыыны ылан, оҕолорум спортивнай разрядтары толорон инникитин үрдүк ситиһиилэр кэлэ туралларыгар баҕарабын” – диэн санаатын үллэһиннэ.

Бу курдук саҥа саҕалааһынтан чаҕыйан турбакка сөптөөх үлэ ыытан, үгүс ситиһии кэлэ турдаҕа. Бу көрүҥ республикабыт иһигэр Дьокуускай, Покровскай, Нерюнгри, Миирнэй куораттарыгар уонна бу биһиги Ньурбабыт улууһугар үлэлиир спорт көрүҥүнэн буолар.

Салҕыы оҕолорбутугар үгүс элбэх ситиһиини, дьаныардаах дьарыгы, кыайыыны-хотууну баҕарабыт!

Муус устар ый 2 күнүгэр маҥнайгытын ыытыллар Ньурбабыт оройуонун художественнай гимнастикаҕа аһаҕас турнирын инники кэскиллэрбит күрэхтэрин Октябрьскай нэһилиэк А.И. Пахомов аатынан спорт саалатыгар кэлэн көрөргүтүгэр ыҥырабыт!

Улуустааҕы физическэй култуура уонна спорт управлениета.

Добавить комментарий

Ваш адрес email не будет опубликован. Обязательные поля помечены *

163113
Бүгүн : 86