Күрэхтэһии түгэннэрэ

Аллараа Бэстээххэ Т.А. Пинегин аатынан спортивнай комплекска 24-гэр диэри саастаах тустууктар Дальнай Восток федеральнай уокуругар бастыыр иһин күрэхтэһиилэрэ ыытылла турар.  

Күрэхтэһии үөрүүлээх аһыллыытыгар Саха Республикатын физическэй култуураҕа уонна спорка министрин бастакы солбуйааччы Александр Бугаев, Мэҥэ Хаҥалас улууһун дьаһалтатын баһылыга Дмитрий Тихонов, Ил Түмэн депутата Андрей Находкин, Саха сирин олимпийскай сэбиэтин салайааччыта, олимпийскай чемпион Павел Пинигин, күрэхтэһии кылаабынай судьуйата Александр Ковалев (Благовещенскай) кыттыыны ыллылар.

Кинилэр республика тыатын сиригэр “Парус” курдук спорка аналлаах баараҕай тутуу үлэҕэ киллэриллэн, маннык улахан таһымнаах күрэхтэһии ыытыллыытыгар бары усулуобуйа тэриллибитигэр махталларын биллэрдилэр.

Бу тэрээһин, Саха сирин үтүөлээх тренерэ Василий Петрович Уваров 75 сааһын туолуутун кытта дьүөрэлэһэн, кэрэ бэлиэ күннээх киһини – улуус баһылыга Дмитрий Тихонов, Ил Түмэн депутата Андрей Находкин, республика көҥүл тустууга сүүмэрдэммит хамаандатын сүрүн тренерэ Александр Оконешников, «Өрөгөй» Спорка бэлэмнэнии киинин дириэктэрэ Михаил Пахомов, спорт маастара Иван Яковлев эҕэрдэлээтилэр, өйдөбүнньүк бэлэхтэрин туттардылар.

Ити курдук, күрэхтэһии үөрүүлээх аһыллыытыгар төрөөбүт Мэҥэ Хаҥалаһын улууһун тустууга уонна хапсаҕайга ситиһиилээхтик көмүскүү сылдьар спортсмен Софрон Софроновка – көҥүл тустууга Россия спордун маастара буолбутунан анал бэлиэ уонна дастабырыанньа туттарылынна.

Үөрүүлээх чааһы хаһан баҕарар буоларыныы, «Кыталык» үҥкүү народнай ансамбла (салайааччы Василий Винокуров) дьэрэкээн үҥкүүнэн киэргэттэ.

Петр ПАВЛОВ.

Ааптар хаартыскаҕа түһэриитэ.