Оҕо ситиһиилэнэригэр аҕа үтүө холобура

Олимпийскай чемпион Павел Пинигин аатынан “Саха сирин тимир суоллара” тэрилтэ бирииһигэр 18-гар диэри саастаахтарга норуоттар икки ардыларынааҕы турнирга 45 киилэҕэ чемпион аатын ким ыларын быһаарса икки сахалыы ааттаах уолаттар тахсыбыттара. Уйусхан уонна Арылхан.

Уйусхан Халгаев уонна Арылхан Контогоров. Кинилэр хапсыһыылара сүрдээх сытыытык, тыҥааһыннаахтык барбыта. Түмүккэ 6:2 ахсаанынан кыайыыны Уйусхан Халгаев ситиспитэ.

PS: Ол тустууну Дьулурҕан хаһыат ютуб каналыгар көрүөххүтүн сөп.

Тустуу кэнниттэн тута сөрөөн кыайыылаахтары наҕараадалаабыттара. Уйусханы бастакынан кыайыытынан кини аҕата, хапсаҕайга спорт маастара Терентий Халгаев эҕэрдэлээбитэ. Санатан эттэххэ, Терентий соторутааҕыта Смоленскайга ыытыллыбыт бэтэрээннэргэ Россия чемпионатыгар бастакы миэстэни ылбыта. Аны төрөппүт уола кыайыы көтөллөннө.

Терентийтэн кылгастык санаатын үллэстэригэр көрдөстүм.

–Дьокуускай куорат олохтооҕобун, Чурапчытааҕы Физкультура институтун тренер-преподаватель салаатын 2006 сыллаахха бүтэрбитим. Билигин “Алмазы Анабара” АО үлэлии-хамсыы сылдьабын. Кэргэним Варвара бухгалтер идэлээх, медицинскэй үөрэххэ медсиэстирэ идэтигэр үөрэнэр. Икки уол оҕолоохпут. Улахаммыт Уйусхан Чурапчытааҕы оҕо спортивнай оскуолатыгар үөрэнэр, быйыл 10-с кылааһы бүтэрдэ, кыра эрдэҕиттэн тустуунан сөбүлээн дьарыктанар.

Уйусхан 2022-2023 сылларга улахан ситиһиилэрэ: Боотурдар оонньууларыгар 2-с миэстэ, “Юность России” (Смоленскай) 1-кы миэстэ, Роман Дмитриев турнирыгар 2-с миэстэ, Н.Н. Тарскай түһүлгэтигэр 1-кы миэстэ, ДВФО күрэхтэһиитигэр (Благовещенскай) 3-с миэстэ, И.В. Балдынов аатынан турнирга (Улан-Удэ) 1-кы миэстэ уонна П.П.Пинигин турнирыгар 1-кы миэстэ.

Уйусхан ситиһиититтэн үөрэбит, оҕобут өссө да инникитин кыайыыта үксүү турдун диэн алгыыбыт.

Кыра уолбут Айсиэн, Дьокуускай куорат 21 нүөмэрдээх оскуолатын 7-с кылааһын бүтэрдэ, дуобакка бастакы спортивнай разрядтаах, ДЮСШ-ҕа дьарыктанар, үөрэҕэр туйгун.

Түгэнинэн туһанан уолбут Уйусхан тустууга тренерэ Афанасьев Юрий Владимировичка махталбытын тиэрдэбит уонна инникитин дьарыктыыр оҕолоро өссө да ситиһиилэнэ туралларыгар баҕарабыт.

Дьэ, ити курдук, аҕалаах уол хайдах эрэ бэйэ-бэйэлэрин икки ардыларыгар куоталаһар курдуктар, бииртэн биир үктэллэри дабайан иһэллэр. Кэпсэтиэм иннинэ Терентийгэ “эн Россияҕа бастаабытыҥ, аны уолун бу турнирга кыайда” диэн эҕэрдэлээн эппиппэр кини: “Оннук, мотивация буоллаҕа”, – диэн хоруйдаабыта.

Халгаевтар инникитин даҕаны олоххо, үлэҕэ-үөрэххэ, спорка ситиһиилэнэ турдуннар.

Петр ПАВЛОВ.

Ааптар хаартыскаҕа түһэриилэрэ.