Интервью

Иннокентий Посельскай: «Вова этэҥҥэ сырыттаҕына ситиһиилэниэҕэ»

Олимпийскай чемпион Роман Дмитриев аатынан көҥүл тустууга эдэрдэргэ норуоттар икки ардыларынааҕы турнир бастакы финаллаах күнүгэр Саха сириттэн Владимир Бояновскай 74 киилэҕэ бастакы миэстэҕэ таҕыста. Кини Россия үөрэҕириигэ туйгуна, 38-с сылын Чурапчыга тренеринэн үлэлиир Иннокентий Посельскай салалтатынан дьарыктанар.  

Иннокентий Семенович, дьэ эҕэрдэ! Иитиллээччин Владимир Бояновскай кыайыыны ситиһэн, тустууну таптааччылары үөртэ. Уолун туһунан кылгастык билиһиннэр эрэ.

-Вова Үөһээ Бүлүүттэн төрүттээх. Сотору 20 сааһын туолар. Билигин Чурапчытааҕы Олимпийскай эрэллэри бэлэмниир училищеҕа иккис кууруска үөрэнэр. Чурапчыга олорор, Чурапчыга дьарыктанар.

Кинини өссө бэһис кылааска үөрэнэ сырыттаҕына, Чурапчытааҕы спортивнай интернат-оскуолаҕа аҕалбытым. Онтон ылата күн бүгүҥҥэ диэри бииргэ үлэлиибит. Бастакы тренерэ – Владимир Литвинов. Уон биирис кылааска үөрэнэ сылдьан уолаттарга Россия күрэхтэһиитигэр үһүс бириистээх миэстэни ылбыта. Улахан эчэйии ылан баран, дьэ өрүттэн, күүскэ дьарыктанан, улахан тустууларга тахсан эрэр. Ааспыт сыл бүтүүтүгэр Бесик Кудухов турнирыгар үһүс миэстэ иһин тустууга ити Марат Фадзаевка 3:5 ахсаанынан сабырыйтаран, бэһис буолбута.

Бу сылга киирэн баран Чурапчыга ыытыллыбыт Николай Тарскай аатынан Саха сирин чемпионатыгар иккис миэстэни ылбыта. Соторутааҕыта республика эдэрдэргэ хамаандатын тренерэ Василий Нестроевы кытта Кавказка тиийэн, үөрэтэр-эрчийэр түмсүүттэн кэллэ.

Бу, Роман Михайлович турнирыгар кыттыыбыт – муус устарга эмиэ манна буолар Россия күрэхтэһиитигэр сүрүн бэлэмнэнии быһыытынан сыаналанар. Манна даҕатан эттэххэ, Володяны кытта норуоттар икки ардыларынааҕы кылаастаах спорт маастара Артур Константинов эмиэ дьарыктанар. Онон киниэхэ тренердэр иккиэбит. Этэҥҥэ буоллаҕына, уол үчүгэйдик сылдьан тустуоҕа диэн эрэнэбит.

-Иннокентий Семенович, махтал! Сыралаах үлэҕэр ситиһиилэри баҕарабыт!

Петр ПАВЛОВ.  

Добавить комментарий

Ваш адрес email не будет опубликован. Обязательные поля помечены *

141135
Бүгүн : 243