Арыйаан Тютрин: «Бэйэни харыстаммакка үлэлиэхтээххин»

Николай Бястинов ыытар «Тайм-Аут» биэриитигэр, соторутааҕыта Албанияҕа ыытыллыбыт Европа көҥүл тустууга чемпионатыгар үһүс бириистээх миэстэни ылбыт Арыйаан Тютрин ыалдьыттаата.

Кини суруналыыс ыйытыыларыгар хоруйдары биэртэлээтэ. Ол курдук, буолан ааспыт чемпионакка алта киилэни түһэринэн кыттыбытын, Беларусь Республикатыгар 57 киилэҕэ сүрүн утарсааччытынан Димчик Батомункуев буоларын кэпсээтэ.

Европа чемпионатыгар ситиһиилээхтик кыттар инниттэн анал үөрэтэр-эрчийэр түмсүүгэ сылдьыбыта туһалаах буолбутун санатта.

Хаһан баҕарар буоларыныы, салгыы туох былааннааҕын туһунан ыйытыыга Арыйаан: «Аныгыскы нэдиэлэҕэ Белоруссияҕа барабын. Сотору Республика чемпионатыгар кыттабын, салгыы Казахстаҥҥа анал үөрэтэр-эрчийэр түмсүүгэ барыахтаахпыт», — диэн хоруйдаата.

Арыйаан, кэлин, ааспытын кэнниттэн кэмсиммэт инниттэн, бу олимпийскай болдьоххо толору тустар санаалаах.

Кини, Саха сирин хамаандатыгар үчүгэй эдэр тустууктар баалларын, дьарыкка күүстээхтэрин, ол эрэн күрэхтэһиигэ киирэн симиктэн хаалалларын убай уонна опыттаах киһи быһыытынан саамай сөпкө ыйар. Ол барыта психологияттан тутулуктааҕын эттэ.

-Бэйэни харыстаммакка үлэлиэххэ наада, — диир 32 саастаах Европа икки төгүллээх призера Арыйаан Тютрин. – Билигин ким үлэлиир – ол кыайар.

Кэпсэтиигэ, Россия уонна Беларусь спортсменнарыгар аны улахан таһымнаах күрэхтэһиилэргэ былаах көтөҕүллэрэ, гимн оонньуура көҥүллэммитин таарыйдылар. Онуоха Арыйаан, хааччах өһүллүбүтэ санааҕа үчүгэйин эттэ. Ону тэҥэ эрдэттэн сыалламмыт-соруктаммыт күрэхтэһиилэргэ ситиһиилээхтик уонна ситимнээхтик кыттар инниттэн — Германияҕа, Бундеслига күрэхтэһиитигэр быйыл икки төгүл ыҥырбыттарыгар барбатаҕын санатта.

Кэпсэтииттэн иһиттэххэ, улахан түһүлгэҕэ бэлэмнэнэн, кини дьиэ кэргэнин үс ый Беларуська илдьэ сылдьан, чугас дьонноро бэйэтин кытта бииргэ сылдьыбыттара, туох да санаата-оноото суох бэлэмнэниини барбыта – мэтээлгэ тиэрдибит. Санатан эттэххэ, Тютрин алта сыл анараа өртүгэр сыбаайбалаабыта, икки кыыс оҕолоох.

Ыытааччы, ити кэлэргэр-бараргар ким көмөлөһөрүй диэн ыйыппытыгар: «Хата, мин дьолбор Беларусь чугас. Онон айаным ороскуотун бэйэм уйунабын. Кырдьык, көннөрү дьон биһигини, спортсменнары баай дьон дии саныыллар. Оннук буолбатах, биһиги дьон ортотунан сылдьабыт, олоробут», — диэн хоруйдаата.

Кэпсэтии кэмигэр Арыйаан тус тренерэ — Саха сирин үтүөлээх тренерэ Иван Иванович Дмитриевкэ махтанарын биллэрдэ.

Онон биэрии түмүгүнэн сыаналаатахха, бөҕөспүт 2028 сыллааҕы Олимпиадаҕа кыттарга сыал-сорук туруорунан үлэлии-хамсыы сылдьар эбит. Киниэхэ ситиһиилэри, туруоруммут сыалын ситиһэригэр баҕарабыт.

Арба, Арыйаан спортсменнаан бүтэн баран, тренер буолар баҕалааҕын быктарда…

Петр ПАВЛОВ.