Татьяна Жиркова быыстапкатыгар

Мэҥэ-Хаҥаласка, Майаҕа, Роман Гаврильевич Васильев аатынан түмэлгэ Российскай Федерация Успуорка үтүөлээх маастара, Саха Ѳрөспүүбүлүкэтин Физическэй култуураҕа уонна успуорка үтүөлээх үлэһитэ, Мэҥэ-Хаҥалас улууһун уонна Доллу нэһилиэгин Бочуоттаах олохтооҕо, Татьяна Юрьевна Жиркова успуорка ситиһиилэрин кэрэһэлиир «Чөмпүйүөн суолунан» диэн быыстапката турда.

Быыстапка аһыллыытыгар эҕэрдэ тылы оройуон баһылыга Тихонов Дмитрий Иванович, Майа нэһилиэгин баһылыга Неустроев Алексей Иннокентьевич уонна В.Ларионов аатынан орто оскуола дириэктэрэ Павел Васильевич Васильев эттилэр.

Татьяна Юрьевна бэйэтин оҕо сааһыттан саҕалаан, успуордунан дьарыктаныытын оскуолаттан, онтон улахан успуорт чыпчаалыгар тахсыытын кэпсээтэ. Төрөөбүт сирин Төҥүлүнү, ииппит эбэлээх эһэтин итиэннэ кинини успуорт ыллыгар сирдээбит Павловскай орто оскуолатын физкултуура уруогун учууталын Анатолий Никитич Осиповы истиҥ иһирэх тылларынан аҕынна.

Татьяна бэһис кылааска маҥнай хайыһар сиэксийэтигэр суруйтаран дьарыктаммыт. Улахан кылааска тахсыытыгар баҕата физкултуура учуутала эбит. Оскуоланы бүтэрэн ити идэҕэ киирэн, эксээмэҥҥэ баала тиийбэккэ, мэдэссиинэ үөрэҕэр киирэн, эмчит идэтин баһылаан, кэлин Саха Ѳрөспүүбүлүкэтин доруобуйа харыстабылын туйгуна бэлиэнэн наҕараадаламмыт.

Быыстапка ис хоһоонугар Татьяна Юрьевна оскуола сааһыттан, 2012 сыллаахха улахан успуортан барыар дылы, үлэҕэ уонна успуорка ситиһиилэрин таһымын кэрэһэлиир докумуоннара, улуус, салалта үрдүкү уорганнарын наҕараадалара уонна тас атын араас дойдуларга күрэхтэһиитин ситиһиитин бэлиэлэрэ (знаки), талисманнара, бэлэхтэрэ   көрдөрүүгэ тураллар.

Элбэхтэн сүрүнүн эттэххэ: улахан кыайыыга дьулуспут сирдэринэн 2002 с. Торхаут куорат (Бельгия), 2004 сыллаахха Винсхотен к. (Голландия) манна сүүрүүгэ 7:10:31 түмүгүнэн Европа рекордун көрдөрбүт, 2008с. Этруск к. (Италия) 7:23:33, салгыы Европа чемпионката Черноголовка к. (Россия) 7:19:51 түмүктэри көрдөртөөбүт. 2005 с. ЮАР-га «TҺe Comrades» аатынан планета 95-һис сылын 89 км сүүрүүгэ (5:58:50) чөмпүйүөнэ уонна 2006 сыл «Два океана» ааттаах сүүрүүгэ 56 км чөмпүйүөнэ.

Татьяна Юрьевна ити ситиһиилэрин көрдөрөн туран, тоһоҕолоон кэпсээбитэ дьон интэриэҺин тарта. ЮАР-га ити улахан ааттаах сүүрүүгэ улахан ситиһиигэ тиксибит спортсмен дьиэ кэргэнэ эмиэ дьоруойга тэҥнээх титулу сүгэрин уонна оннук үлүгэр үрдүк сыанабылы ити дойдуга биэрэллэрин кэпсээтэ. Салгыы быыстапка Манчаары оонньууларыттан, спартакиадаттан, өрөспүүбүүкэҕэ оройуон чиэһин көмүскүүр, Россия регионнарыгар кыттыытын тэнитэн кэпсиир наҕараадаларын сэргээн көрүөххүт диэн эрэнэбит.

Маны таһынан успуорка үрдүк таһымнаах ситиһиилэрин иһин, Татьяна Юрьевна «Лучшие люди России» диэн кинигэҕэ киирбитэ. Итини таһынан, «Единственная трехкратная Чемпионка Мира за всю истории сверхмарафона» диэн  суруктаах, Аан дойдутааҕы үрдүк таһымнаах марафон ассоциациятын (ассоциации сверхмарафона) аатыттан сертификатынан наҕараадаламмыта.

Татьяна Юрьевна бу ыытыллыбыт «Чөмпүйүөн суолунан»диэн  быыстапканы тэрийбит улууһун олохтоохторугар уонна Р.Г. Васильев аатынан кыраайы үөрэтэр түмэл үлэһиттэригэр улахан махталы эттэ.

Киниэхэ анаммыт быыстапка уонна кини аатынан сүүрүү сыала-соруга хас биирдии киһини, ыччаты Чөл олохтоох, кэрэни кэрэхсиир, майгы-сигили тупсуутугар ыҥырар уонна успуорт араас көрүҥүнэн дьарыктаныыга көлүөнэттэн көлүөнэҕэ бэриллэ турарыгар туһуланар.

Анна ПЕТРОВА, СѲ үөрэҕин туйгуна.