Бириистэри кимнээх туруордулар?

Тааттаҕа буолан ааспыт, республикаҕа тустуу сайдыбыта 70 уонна саха бөҕөстөрө Монреаллааҕы-76 Олимпиадаҕа өрөгөйдөрүн 50 сылларыгар ананан ыытыллыбыт Н.Н. Тарскай кэриэһигэр көҥүл тустууга Саха сирин биирдиилээн уонна хамаанданан бастыыр иһин чемпионатыгар ыйааһын ахсын бастаабыттарга – улуустар олохтообут бириистэрэ туттарылыннылар.

57 киилэ кыайыылааҕа Федор Постниковка (Таатта) – сахалартан бастакынан уолаттарга аан дойду чемпиона буолбут Илларион Федосеев аатынан оҕолоро уонна аймахтара туруорбут 30 тыһ. солк. харчынан анал бириистэрин, наҕараадалааһын кэмигэр Таатта улууһун баһылыга Айаал Семенович Бурцев туттарда.

61 кг ыйааһыҥҥа чемпионнаабыт Яков Павловка (Томпо) – номоххо киирбит бөҕөс Николай Захаров – Сахаачча аатынан Амма улууһун дьаһалтатын баһылыга туруорбут харчынан бирииһин Амма хамаандатын сүрүн тренерэ, спорт маастара Кирилл Павлов туттарда.

65 кг бастакы миэстэни ылбыт Виктор Яковлев (Дьокуускай) – сахалартан бастакынан ССРС уолаттарга чемпионунан буолбут Вячеслав Павлович Карпов аатынан 30 тыһ. солк. харчынан уонна өйдөбүнньүк бирииһинэн наҕараадаланна. Бирииһи В.П. Карпов уола Павел Карпов туттарда.

70 киилэҕэ чемпионнаабыт Айхан Антоновка (Ньурба) – ССРС тыатын сирин үс төгүллээх чемпиона, Манчаары-1968 спартакиадатын хапсаҕайга муҥутуур кыайыылааҕа Владимир Андросов аатынан 30 тыһ. солк. харчынан анал бирииһи аймахтарын аатыттан көҥүл тустууга Россия, хапсаҕайга Саха сирин спортарын маастара Игнат Андросов туттарда.

74 кг бастаабыт Айсен Потапов (Үөһээ Дьааҥы) – Саха сирин көҥүл тустууга 15 төгүллээх чемпиона Игорь Кудрявцев аатынан Үөһээ Халыма улууһун дьаһалтатат туруорбут 20 тыһ. солк. харчынан бирииһинэн наҕараадаланна. Бирииһи СР физическэй култуураҕа уонна маассабай спорка управлениетын начальнига Роман Иванович Оконешников туттарда.

79 киилэҕэ чемпионнаабыт Олег Фомиҥҥа (Чурапчы) – ССРС спордун маастара Константин Леонтьев аатынан Горнай улууһун Кировскай нэһилиэгэ олохтообут 20 тыһ. солк. харчынан бирииһин – Горнай улууһун спорка управлениетын начальнига Айтал Петрович Алексеев туттарда.

86 кг ыйааһыҥҥа тэҥнээҕин булбатах Андриан Ленскэй (Чурапчы) – ССРС уонна Саха АССР спортарын маастара, норуот хаһаайыстыбатын үтүөлээх үлэһитэ, Уус Алдан, Чурапчы, Амма улуустарын бочуоттаах олохтооҕо Максим Николаевич Сибиряков аатынан Чурапчы улууһун баһылыга туруорбут 30 тыһ. солк. харчынан бирииһин улуус депутаттарын сэбиэтин салайааччы Яков Павлович Оконешников туттарда.

92 киилэҕэ бастаабыт Александр Халыевка (Таатта) – саха бастакы көлүөнэ тустууктарыттан биирдэстэрэ Илья Кондратьев аатынан Хаҥалас улууһа туруорбут 20 тыһ. солк. харчынан анал бирииһинэн наҕараадаланна.

97 кг ыйааһыҥҥа чемпионнаабыт Никита Софроновка (Чурапчы) – Саха сиригэр көҥүл тустууну төрүттээччилэриттэн биирдэстэрэ, республика элбэх төгүллээх чемпиона, Бүлүү уонна Уус Алдан улуустарын бочуоттаах олохтооҕо Василий Румянцев аатынан, кини төрөппүт уола Андрей Васильевич олохтообут 30 тыһ. солк. харчынан бирииһин Уус Алдан улууһун спорка управлениетын начальнига Евгений Петрович Алексеев туттарда.

125 кг бастаабыт Никита Хабаровка (Мэҥэ Хаҥалас) – биллиилээх бөҕөс Алексей Атласов аатынан анал бирииһи — Штиль эрбиини Мэҥэ Хаҥалас улууһун баһылыга Дмитрий Иванович Тихонов туттарда.

Маны тэҥэ чемпионат бастыҥ бөҕөһүнэн ааттаммыт Олег Фомиҥҥа – РСФСР чемпиона Аркадий Аманатов аатынан анал бирииһи – 50 тыһ. солк. харчыны уонна саха быһаҕын Уус Алдан улууһун баһылыга Василий Петрович Алексеев туттарда.

Ити курдук, саха тустуутун үбүлүөйдээх сылыгар тэриллибит Саха сирин чемпионатыгар кыайыылаахтарга – улуустар бэйэлэрин биллэр бөҕөстөрүн аатынан бириистэри олохтообуттара, итинэн кинилэр ааттарын санаппыттара кэрэхсэбиллээх.

Петр ПАВЛОВ.