Альфред Афанасьев наартаны 810-на ойдо

Хотугу многоборьеҕа өрөспүүбүлүкэҕэ бастыыр иһин оҕолорго күрэхтэһии Үөһээ Бүлүүгэ буолан ааста. Элбэх улуустан кэлэн кыттыыны ыллылар. Ол курдук, Анаабыр, Аллайыаха, Верхоянскай, Өлүнүөк, Нерюнгри, Таатта, Чурапчы, Бүлүү, Горнай уонна Дьокуускай куораттан тиийэ кэлэн күрэхтэстилэр.

Бүлүү сүүмэрдэммит хамаандатын Анисимов Иван Алексеевич илдьэ сырытта. Уопсай хамаанданан түмүккэ 4-с миэстэ буоллубут уонна биир улахан ситиһиибитинэн, наартаны 810-на ойон – Афанасьев Альфред өрөспүүбүлүкэҕэ бастыҥ көрдөрүүнү олохтоото.

Үчүгэй көрдөрүүнү ситистилэр: 11-тэн аллараа саастаах кыргыттарга уонна уолаттарга Протопопова Уйгулана үстэ төхтүрүйэн ыстаныыга 3-с, ураҕастаах сүүрүүгэ 1-кы миэстэ (тренерэ Рожина Т.И.), Афанасьев Оскар үстэ төхтүрүйэн ыстаныыга 2-с, наартаны ойууга уонна ураҕастаах сүүрүүгэ 1-кы миэстэ (тренерэ Рожина Т.И.), Федотов Кеша үстэ төхтүрүйэн ыстаныыга 4-с миэстэ (тренерэ Архангельская И.А.), Андреева Милана 500 м ураҕастаах сүүрүүгэ 5-с миэстэ (тренерэ Рожина Т.И.).

Оттон 12-13 саастаах кыргыттарга уонна уолаттарга: Афанасьев Альфред наартаны 810-на ойон, 2018 сыллаахха Маисов Ян (Бүлүү) 610-на ойбут көрдөрүүтүн куоһарда, ураҕастаах сүүрүүгэ 2-с миэстэ (тренердэрэ: Анисимов И.А., Рожина Т.И.), Афанасьева Виктория сүгэни ыраах быраҕыыга 3-с миэстэ (тренерэ Новгородова С.К.), Кривошапкина Селена үстэ төхтүрүйэн ыстаныыга 4-с миэстэ (тренерэ Архангельская И.А.), Алексеева Вероника наартаны ойууга 5-с миэстэ (тренерэ Архангельская И.А.).

14-15 саастаах кыргыттарга бу суруйуу ааптара 1000 миэтэрэҕэ ураҕастаах сүүрүүгэ төрдүс миэстэ буоллум.

Спордунан бииргэ дьарыктанар оҕолорбор өссө үрдүк ситиһиилэри баҕарабын!

Наина Ионова, И.Л. Кондаков аатынан Бүлүү гимназиятын 9-с кылааһын үөрэнээччитэ.