Бары бириистэргэ тигистилэр

Муус устар 19 күнүгэр Саахымат-дуобат киинигэр саахымакка оҕолору уhуйааччы, киин куорат иккис оскуолатын учуутала Мария Семеновна Охлопкова 55 сааhыгар анаммыт күрэхтэhиигэ 22 бэтэрээн дьахталлар кыттыннылар. Кинилэр ортолоругар араас кэмнэргэ республикаҕа биэс бастыы сылдьыбыттар, итиэннэ Дальнай Восток эдэрдэргэ призер буола сылдьыбыт, кэккэ республиканскай мемориаллар, cпортобществолар, улуустар чемпионкалара уонна призердара бааллар.

Сэттэ туурдаах түргэн оонньуу күрэхтэһиитигэр хатыhыылаах киирсиилэр буоллулар. Үс туур кэнниттэн үстүү очукуолаах Галина Эверстова, Ольга Иванова, Марина Аллахинова лидер буолбуттара, төрдүс туурга Эверстова-Аллахинова тэҥнэспиттэригэр, Ольга Иванова М.Дьячковскаяны кыайан соҕотох лидер буола түстэ.

Ол эрээри, бэhис туурга Г.Эверстова кинини кыайан лидер буолла, Аллахинова Елена Федороваҕа хотторуута соhуччу буолла, итиэннэ балаhыанньата уустугура түстэ. Алтыс туурга Г.Эверстова М.Дьячковскаяны кытта тэҥнэстэ, О.Иванова Е.Федорованы бэриннэрдэ, кыайтарыытыгар кыһаллыбат Аллахинова М.Фоминаны кыайда. Бүтэhик туурга Федорова Эверстоваҕа хоттордо, онон алта очукуоламмыт республика үс төгүллээх чемпионката Г.Эверстова бастаата. М.Дьячковская иккис миэстэни ылла. Республика түөрт төгүллээх чемпионката Аллахинова Иванованы кыайан үhүс призер буолла.

Республика экс-чемпионкатын М.Ноеваны хоппут республика үс төгүллээх чемпионката Марфа Дьячковская иккис миэстэҕэ үhүс призеры коэффициенынан баhыйан таҕыста. Төрдүс-бэhис миэстэлэри биэстии очукуолаах Мэҥэ-Хаҥалас саахыматчыттара О.Иванова, У.Шишигина үллэhиннилэр. Түөрт киhи түөртүү очукуоланнылар, манна коэффициенынан баhыйан Е.Федорова (Нам) алтыс буолла.

Оттон 70 саастарыттан үөһэлэргэ У.Шишигина бастакы, Н.Трифонова иккис, Р.Маппырова үһүс миэстэлэри ыллылар.

Күрэхтэһии түмүгэр М.С. Охлопковаҕа саахымат федерациятыттан махтал сурук уонна бэлэх туттарылынна.

Бары күрэхтэhээччилэр кыайыы өрөгөйүн биллилэр – ким да очукуо биэрээччи буолбата, итиэннэ бары кыттааччылар сыаналаах бириистэри турнир тэрийээччитин илиититтэн тутан үөрэн-көтөн тарҕастылар.

Петр Яковлев.