Аппыт сүүрүүтүн 100 сыла ЧАХЧЫ ДУУ, СЫЫҺА ДУУ?

Тыһыынчанан киһи ат сүүрүүтүн көрөр, сэҥээрэр. Оттон бу аппыт сүүрүүтэ, аныгылыы диэххэ. Анал ат баайааччылаах, сүүрдээччилээх, сүүрэр суоллаах, көнньүүһэлээх, сылгы даллаах хаһан саҕаламмытай?

Билигин үгүспүт, ону да интириэһиргиир дьон 1935 сылынан ааҕабыт. Ол сыл Дьокуускай куоратыгар анал туруктаах ипподром тэриллибитэ. Бу ат сүүрүүтүн олус өйүүр Саха сирин Совнаркомун бэрэссэдээтэлэ Степан Аржаков туруорсуутунан этэ. Соторутааҕыта республика архыыбыттан олус сэдэх докумуон көстүбүтэ. Онно этиллэринэн Саха сиригэр, оччолорго саҥа тэриллэн эрэр автономияҕа ат сүүрүүтүн тэрийии туһунан сүбэ мунньах ыытыллыбыт. Тэрээһини Саха сиригэр Сэбиэскэй былааһы олохтооччулартан биирдэстэрэ, Саха сирин автономиятын оҥорсубут киһи, Совнарком бэрэссэдээтэлэ Степан Аржаков бэрэссэдээтэллээх ыыппыт. Манан көрдөххө, биһиги бу кэми Саха сиригэр ат сүүрүүтэ олохтоммут кэминэн ааҕар бырааптаахпыт дуо?

Манна өссө биири эбиэххэ сөп. Ат сүүрүүтүн олус өйүүр Степан Аржаков быһаччы туруорсуутунан, Былатыан Ойуунускай өйөбүлүнэн ипподром тутуутун туһунан 1926 сыллаахха кэпсэтии барбыт. Онтон 1935 сыллаахха, чахчылар көрдөрөллөрүнэн, Дьокуускай республикатааҕы ипподром тэриллибит. Бу кэмтэн ыла сэрэйдэххэ, тэрээһиннээх ат сүүрүүлэрэ ыытыллыбыт буолуохтарын сөп. Хомойуох иһин, оччотооҕу программалар хараллыбакка, чопчу этэр кыах суох. Билиҥҥитэ официальнай программалаах сүүрүү 1947 сыллаах эрэ баар. Ону да, ат сүүрүүтүгэр бэт бэриниилээх Алексей Георгиевич Алексеев – Амма Өлөксөйө көрөн харайан хаалларбытын өҥөтө.

Михаил МОРДОВСКОЙ-Михута.

Бэрдьигэстээх, Горнай.