Ох саанан ытааччылар күрэхтэһэллэр

РФ үөрэҕириитин туйгуна, «Азия оҕолоро» фонда лауреата Хаҥалас улууһун Кыһыл Үрүйэтиттэн төрүттээх Тамара Спиридоновна Стасова сырдык кэриэһигэр ох саанан ытыыга ыччаттар уонна оҕолор ортолоругар өрөспүүбүлүкэтээҕи аһаҕас турнир Покровскайга ыытылла турар.

Манна Дьокуускай куораттан, Мэҥэ Хаҥаластан, Тааттаттан, Чурапчыттан, Хаҥаластан, Үөһээ Бүлүүттэн, Ньурбаттан, Горнайтан барыта 195 эдэр охчуттар бааллар. Күрэхтэһии классическай оҕунан уонна блогунан ытыыларга буола турар. Классиканан ытыыга  бөлөхтөрүнэн ыччаттар 2004-2006 с.т., улахан оҕолор 2007-2010 с.т. 18 м уонна кыралар 2011 сылтан кыра саастаахтар 12 миэтэрэ ыраах сиргэ сыалы ыталлар.

Блок оҕунан 2006-2010 с. төрүөх оҕолор ыталлар. Билигин күрэхтэһии сүрүн күннэрэ биирдиилээн уонна хамаанданан бастыыр иһин ытыылар финаллара буола тураллар.

Уйбаан УЙГУУРАП. Хаҥалас.

Ааптар хаартыскалара.