Дьокуускай тустууга федерациятын саҥа састааба талылынна

Дьокуускай куорат спортивнай тустууга федерациятын отчуоттуур-быыбардыыр конференцията ыытылынна.

Киирии тылга федерация салайааччытын бастакы солбуйааччы Прокопий Семенович Иванов бу общественнай тэрилтэ ыытан кэлбит үлэтин билиһиннэрдэ итиэннэ киин куоракка көҥүл тустуу салгыы сайдыытыгар инники соруктары туруорда.

Ол кэнниттэн санаа атастаһыыта буолла. Федерация саҥа састааба талылынна. Ол курдук, Дьокуускай куорат спортивнай тустууга федерациятын салайааччытынан “Строительнай” атыы-эргиэн киинин генеральнай дириэктэрин көмөлөһөөччүтэ, ССРС спордун маастара Николай Константинович Адушинов биир санаанан талылынна.

Федерация бэрэссэдээтэлин бастакы солбуйааччынан Прокопий Семенович Иванов буолла. Оттон “Строительнай” атыы-эргиэн киинин генеральнай дириэктэрэ Иван Иванович Данилов, Руслан Михайлович Платонов, Дмитрий Афанасьевич Егоров – бэрэссэдээтэли солбуйааччыларынан, В.П. Керемясов аатынан куорат 3 №-дээх спортивнай оскуолатын дириэктэрин солбуйааччы Вячеслав Александрович Кривошапкин федерация толорооччу дириэктэринэн, В.П. Керемясов аатынан Дьокуускай 3 №-дээх спортивнай оскуолатын дириэктэрэ Василий Васильевич Уйгуров федерация эппиэттээх секретарынан талылыннылар.

Отчуоттуур-быыбардыыр конференция үлэтин түмүгүнэн Дьокуускай куорат спортивнай тустууга федерациятын чилиэннэринэн буоллулар: В.П. Керемясов аатынан куорат 3 №-дээх спортивнай оскуолатын дириэктэрин солбуйааччы Николай Петрович Иванов, СР Спорка бэлэмнэнии киинин дириэктэрэ Михаил Дмитриевич Пахомов, Тулагы Киллэм нэһилиэгин баһылыга Егор Гаврильевич Попов, “Аэропорты Севера” ФКП Маҕаннааҕы пордун филиалыгар административнай хаһаайыстыба отделын начаалынньыга Анатолий Егорович Мурунов, Дьокуускай куорат көҥүл тустууга хамаандатын сүрүннүүр тренерэ Будимир Григорьевич Яковлев, Дьокуускай куорат хапсаҕайга хамаандатын сүрүннүүр тренерэ Станислав Егорович Афанасьев, В.П. Керемясов аатынан куорат 3 №-дээх спортивнай оскуола тренерэ Степан Семенович Соркомов, индивидуальнай предпринимателлэр: Владислав Васильевич Петров, Макар Николаевич Зырянов, Ян Владимирович Емельянов, Алексей Алексеевич Филиппов.

Манна даҕатан эттэххэ, Дьокуускай 3 №-дээх спортивнай оскуолатын иитиллээччилэрэ В.В. Петров, М.Н. Зырянов, Я.В. Емельянов урукку да өттүгэр куорат тустуутугар көмөлөһөр этилэр, бу сырыыга кинилэр күүс-көмө буолар кэммит кэллэ диэн бэйэлэринэн федерация састаабыгар киирбиттэрэ уонна өйөбүл буоларга бэлэмнэрин биллэрбиттэрэ кэрэхсэбиллээх.

Саҥа састаапка ситиһиилээх, таһаарыылаах үлэни баҕарабыт!

Дьулурҕан.