Икки бөҕөспүт финалга таҕыста

Красноярскайга Иван Ярыгин кубогар дьахталлар уонна эр дьон тустууларыгар норуоттар икки ардыларынааҕы XXXVI турнир бастакы күнэ түмүктэннэ. Саха сирин хамаандата эриэ-дэхси көрдөрүүлэннэ.

Киһи эрэ барыта эрэммит бөҕөһө, Россия чемпионатын үрүҥ көмүс призера Лев Павлов (57 кг) бастакы эргииргэ сынньанан баран, иккискэ уонна үһүскэ Р.Абдурахимовы (С-Петербург) 3:2, А.Муталиевы (Дагестан) 6:4 ахсааннарынан кыл мүччү кэриэтэ кыайталаата, финалга тахсар иһин хапсыһыыга олохтоохтор эрэллэрэ Артур Чебодаевы 6:3 ахсаанынан хотто. Лев тустуутун көрдөххө, хонноҕо дьэ арыллан иһэр курдук.

Манна даҕатан эттэххэ, Чебодаевы Саҥа дьыл иннинэ эмиэ Красноярскайга Д.Г. Миндиашвили аатынан Бүтүн Россиятааҕы турнир быһаарыылаах киирсиитигэр кыайбыта.

Финалга, Лев – былырыын Россия чемпионатыгар кылбардык быраҕан түһэрэн кыайбыт киһитэ – тувинец Начын Монгуһу кыттар көрсөр буолла.

Лев Павлов финалга тахсыбыта үчүгэй гынан баран, бу ыйааһыҥҥа тустубут уолаттарбыт бары бастакы эргииргэ хотторбуттара – толкуйу үөскэтэр. Өскөтүн өссө Айаал Белолюбскай – Абдурахимовтыын тустуутун сууттааһын, биһиги санаабытыгар сыыһалаах курдук буоллаҕына, атыттар (Яков Павлов, Артём Слепцов, Любомир Ашеин, Федор Постников) хобдохтук хоттордулар. Эһиги хайдах саныыргыт эбитэ буолла? Оттон мин санаабар, олох кыайар дьонноругар бэйэлэрэ сыыһа, дух-дах туттан кэбистилэр. Бу хотторуулар улахан ырытыыны эрэйэллэр. Чэ, ол туһунан, күрэхтэһии кэнниттэн суруйууларга…

Оттон билигин түөрт күннээх күрэхтэһиибит бастакы эрэ күнэ түмүктэннэ.

61 киилэҕэ, Д.П. Коркин турнирын кыайыылааҕа Александр Авелов үчүгэйдик туһунна. Бастаан, Россия эдэрдэргэ түһүлгэтин призера, дагестанец Халид Магомедовы 13:3 ахсаанынан аһара баһыйан хотто. Салгыы эмиэ дагестанец А.Зубайровы 12:7 кыайда. Үһүс эргииргэ уруккуттан эриһэр киһитэ Кежик Монгуһу (Иркутскай) кытта хардары-таары бырахсыылаах хапсыһыыга 12:8 ахсаанынан кыайда. Манна, Авелов байыастыы характерын уонна кыайыыга дьулуурун көрдөрдө. Итиэннэ урукку хотторуутун боруостаата. Оттон финалга тахсар иһин киирсиигэ олимпийскай чемпион Заур Угуевка 0:5 хоттордо. Онон сарсын боруонса мэтээл иһин тустуоҕа.

Бу ыйааһыҥҥа атын уолаттарбытыттан Ньургун Терентьев икки утарсааччытын кыайан баран, Муслим Мехтихановка (Дагестан) очукуонан ыраастык хоттордо. Киһитэ финалга тахсыбытын быһыытынан, Терентьев сарсын «уоскутар» бөлөххө киирсэр буолла.

Оттон Виктор Яковлев уонна Петр Константинов бүгүҥҥү бэлэмнэринэн син туста сатаатылар диэххэ сөп. Эдэр бөҕөс Эдуард Попов төһө да опыттаах Кежик Монгушка хоттордор (10:12), инникитин кэскиллээҕин көрдөрдө.

70 киилэҕэ уолаттарбыт бэркэ туһуннулар. Хамаанда хапытаана Константин Капрынов – күрэхтэһиини иккис эргииртэн саҕалаабыта. Кини – Исаевы (С-Петербург) 10:0, Тинаевы (Красноярскай) ыраастык уонна финал чиэппэригэр, үгүс специалистар бу ыйааһыҥҥа бастыа диэн сылыктаабыт киһилэрин – Европа чемпиона дагестанец Курбан Шираевы 9:6 ахсаанынан кыайыыта, биир дойдулаахтарын сүргэлэрин көтөхтө.

Финалга тахсар иһин киирсиигэ Капрынов бэйэтин киһитэ – былырыыҥҥы Ярыгин турнирын үһүс призера Айсен Потаповы 5:2 ахсаанынан баһыйда. Потапов – Рахат Уулуну (Кыргызстан), Гаджиевы (Дагестан) хотон баран, бу иннинэ Е.Жербаевы кыайбыт осетин Алан Кудзоевы ыраастык ууран кэбистэ. Өскөтүн Капрынов сарсын финалга тустар эбит буоллаҕына, Айсен боруонса мэтээл иһин киирсиэҕэ.

Кыргыттарбытыттан Севиль Назарова уонна Александра Копылова иккилии кыайыылаах, биирдии хотторуулаах буолан, куһаҕана суох өйдебүлү хааллардылар.

Онон сарсын Лев Павлов, Константин Капрынов кыһыл көмүс, Александр Авелов, Айсен Потапов, Севиль Назарова боруонса мэтээл иһин киирсиэхтэрэ.

Сарсыҥҥы финалга көрсүөхтэрэ:

57 кг: Лев Павлов (Саха сирэ) – Начын Монгуш (Тыва)

61 кг: Муслим Мехтиханов – Заур Угуев (иккиэн Дагестан)

70 кг: Давид Баев (Хотугу Осетия-Алания) – Константин Капрынов (Саха сирэ).

Тустуу сарсын, тохсунньу 24 күнүгэр эмиэ Дьокуускай бириэмэтинэн күнүс 13:00 чаастан саҕаланар.

Петр ПАВЛОВ.