Одинцово-2024: 61 киилэҕэ сэттэ бөҕөспүт кыттар

Бүгүҥҥүттэн Москва уобалаһын Одинцово куоратыгар көҥүл тустууга Россия чемпионата саҕаланар. Бастаан эр дьоҥҥо 61 уонна 92 кг ыйааһыннаахтар тусталлар.

Бу суруйууга биһиги уолаттарбыт 61 кг ыйааһыҥҥа кимнээҕи кытта тустар буолбуттарын билиһиннэрэбит.

61 киилэҕэ – 48 кыттааччы сэрэбиэйи ааспыт. Манна биһигиттэн сэттэ бөҕөс күөн көрсөр. Өскөтүн олимпийскай ыйааһыннарга сэрэбиэй оҥоһуутугар бастыҥнары талан ылан араартаабыт эбит буоллахтарына – 61, 70, 79, 92 кг ыйааһыннарга оннук суох. Бары сэрэбиэй быһыытынан аттарыллан туруорулуннулар.

Бастакы эргииргэ, атыннык эттэххэ квалификацияҕа Петр Константинов – Р.Жилясовы (Оренбург), Яков Павлов – Р.Бутуевы (Чечня), Виктор Яковлев – Б.Магомедовы (Дагестан), Артур Семенов – М.Абдурахмановы (С-Петербург), Михаил Иванов – В.Тюрины (Калининград), Манчаары Ильинов – Х.Акимовы (Крым) кытта киирсиэхтэрэ. Онтон Александр Авелов финал 16/1-гэр дагестанец Динислам Тахтаровы кытта тустуо.

Сылыктаан көрдөххө, бу ааттаммыт бөҕөстөрбүтүттэн – биэс киһи бастакы эргиири этэҥҥэ ааһыахтарын сөп курдук. Холобур, Константинов, Павлов, Иванов, Ильинов – кыайыахтаахтар! Авеловка опыттаах утарсааччы түбэспит. Ол эрэн, Александр кэнники үчүгэй хапсыһыылары көрдөрөр. Кытаанах характерын, кыайыыга дьулуурун өссө төгүл итэҕэтиэхтээх, бу сырыыга хотуохтаах. Эрэнэбит! Онтон Семенов туруга хайдах эбитэ буолла? Чэ бээ, итинник курдук, көбүөр көрдөрүө…

Бу ыйааһыҥҥа уһун сылларга бастыҥын биллэрбит Россия, Европа, аан дойду чемпиона Абасгаджи Магомедов бу сырыыга бэйэтин күүһүн олимпийскай ыйааһыҥҥа – 65 кг холонор. Ол оннугар былырыыҥҥы Россия чемпионатын 57 киилэҕэ финалистара Заур Угуев уонна Артем Гобаев – 61 кг тустарга санаммыттар.

Ылан көрдөххө, бу ыйааһыҥҥа Муслим Мехтихановы чорботуохха сөп. Атыттар бары тэҥнэр. Ким эрэ бэйэтин суолун солоон тахсыан сөп, ким эрэ күүстээххэ түбэһэн хотторон баран, киһитэ финалга тахсар түгэнигэр салгыы тустуон сөп. Тустуу быраабылата оннук.

Чемпионат хаамыытын күннэтэ сырдатан иһиэхпит. “Дьулурҕан” сайтын, ютуб каналын, Телеграмҥа страницатын кэтээн көрө сылдьаргытыгар.

Бүгүн, муус устар 30 күнүгэр чемпионат хапсыһыылара Дьокуускай бириэмэтинэн 17:00 чаастан саҕаланаллар. Хаһан баҕарар буоларыныы, уолаттарбытыгар ыалдьабыт. Ситиһиилээх тустууну баҕарабыт!

Петр ПАВЛОВ.