Тарскай-2025: Кыайыылаахтарынан кимнээх буолуохтарай?

Сунтаарга, Николай Николаевич Тарскай кэриэһигэр, Россия уонна Донецкай Республика Геройа Дмитрий Николаевич Егоров 50 сылыгар аналлаах Саха Республикатын көҥүл тустууга биирдиилээн уонна хамаанданан бастыыр иһин чемпионатыгар ыйааһыннарынан кимнээх бастакы миэстэ иһин тусталлара билиннэ.

57 кг: Любомир Ашеин (Чурапчы) – Кэскил Семенов (Сунтаар)

61 кг: Федор Постников (Таатта) – Артем Слепцов (Чурапчы)

65 кг: Уйгулаан Иванов (Мэҥэ Хаҥалас) – Юлиан Григорьев (Сунтаар)

70 кг: Николай Охлопков (Сунтаар) – Ньургун Скрябин (Мэҥэ Хаҥалас)

74 кг: Айсен Потапов (Үөһээ Дьааҥы) – Константин Капрынов (Чурапчы)

79 кг: Николай Сивцев (Мэҥэ Хаҥалас) – Олег Фомин (Чурапчы)

86 кг: Анатолий Никитин (Мэҥэ Хаҥалас) – Виталий Ефремов (Чурапчы)

92 кг: Владимир Данилов (Сунтаар) – Андриан Ленскэй (Чурапчы)

97 кг: Ньургун Сергин (Сунтаар) – Евгений Аронов (Мирнэй)

125 кг: Никита Хабаров (Мэҥэ Хаҥалас) – Никита Софронов (Чурапчы).

Көстөрүн курдук, Чурапчы хамаандатыттан сэттэ бөҕөс чемпион иһин тустуоҕа. Олохтоохтор – сунтаардар уонна мэҥэлэр – биэстии киһилэрэ быһаарыылаах хапсыһыыга таҕыста. Манна сыһыары тутан эттэххэ, күрэхтэһиини тэрийэн ыытааччылар быһаарыыларынан, олунньу 25 күнүгэр – Европа 23-гэр диэри саастаахтарга түһүлгэтигэр Россияттан ким кыттарын быһаарар хапсыһыыга бэлэмнэнэр Лев Павловка, Сунтаардааҕы чемпионакка 57 киилэҕэ кыайыылаах очукуота быһа бэрилиннэ. Онон, мэҥэлэри кытта күрэстэһиигэ билиҥҥитэ сунтаардар чорбохтоохтор диэххэ сөп.

Дьэ, ыйааһыннарынан быһаарыылаах хапсыһыыга ким элбэх кыттааччылааҕынан, хамаанданан түмүк тахсар буолуохтаах. Ол аата, бастакы миэстэ иһин сүрүннээн Чурапчы, Сунтаар уонна Мэҥэ Хаҥалас хамаандалара киирсэр буоллулар диэххэ сөп. Оттон Таатта, Үөһээ Дьааҥы уонна Мирнэй биирдии киһилэрэ бастакы миэстэ иһин тустуоҕа.

Быйылгы чемпионаты – эдэрдэр, саха тустуутун инники кэскиллэрэ тахсыыларын курдук сыаналыахха сөп.

“Дьулурҕан”.