Кыһыҥҥы спартакиадаҕа бэлэмнэнии хайдаҕый?

Эрдэ иһитиннэрбиппит курдук, кулун тутар 25-31 күннэригэр Алдан уонна Нерюнгри куораттарга Саха сирин спорт кыһыҥҥы көрүҥнэригэр V спартакиадата ыытыллар.

Ол курдук, Алдаҥҥа – хайыһар, кыһыҥҥы многоборье, спортивнай ориентирование, шорт-трек, биатлон көрүҥнэригэр, онтон Нерюнгрига – шайбалаах хоккей, хайаттан хайыһарынан түһүү, хотугу троеборье, сноуборд, фигурнай хаҥкылааһын күрэхтэһиилэрэ ыытыллыахтара.

Манан сибээстээн биһиги кэккэ улуустар спорка салайааччыларыттан, специалистарыттан, бу спартакиадаҕа хайдах кыттаары сылдьалларын сурастыбыт.

Дьулустаан Егоров, Чурапчы улууһун спорка тэрилтэтин салайааччыта.

-Биһиги хамаандабытыгар бэрэстэбиитэллэри кытта холбоон барыта 45 киһи кыһыҥы спартакиадаҕа кыттар. Спорт аҕыс көрүҥэр кыттарга сананныбыт. Хаһан баҕарар буоларыныы, бириистээх миэстэҕэ киирэргэ дьулуһабыт буоллаҕа дии. Хайыһардьыттарбытын Бурятияҕа ыытан эрчийэн аҕаллыбыт. Бу күннэргэ дойдуларыгар кэлэн бэлэмнэниини салгыы сылдьаллар. Састааппыт сүрүннээн эдэрдэр, саҥалар. Надежда Елисеева кыттыахтаах. Бэйэбит икки автобуһунан айаннаары сылдьабыт.

Гаврил Евсеев, Бүлүү спорка тэрилтэтин кылаабынай специалиһа.

-Бүлүү 7 киһилээх хамаандата сноубордка, хайыһарга, спортивнай ориентированиеҕа, горнолыжнайга уонна хотугу многоборьеҕа кыттар. Делегацияны улуус аҕа баһылыгын бастакы солбуйааччы Евсеев Иван Иванович уонна Бүлүү спорткомитетын председателэ Калачикова-Яковлева Ольга Ивановна салайан илдьэ бараллар. Делегация единэй формата, айанын боппуруоһа уонна да атын ороскуоттара барыта улуус өттүттэн хааччылынна. Спортсменнарбытыгар эрэнэбит!

Степан Константинов, Горнай улууһун спорка комитетын председателэ.

-Биһиги улууспутуттан кыһыҥҥы спартакиадаҕа барыта 32 спортсмен кыттыыны ылар. Кинилэр спорт 9 көрүҥэр күрэхтэһиэхтэрэ. Ол курдук, шорт треккэ – 1, спортивнай ориентированиеҕа – 3, хайыһарга – 7, биатлоҥҥа – 3, хайаттан хайыһарынан түһүүгэ – 4, сноубордка – 3, хотугу троеборьеҕа – 4, кыьыҥҥы многоборьеҕа – 4, фигурнай хаҥкылааһыҥҥа – 3 спортсмен. Бу барыта Горнай бэйэтин спортсменнара, биһиэхэ биир да легионербыт суох.

16 спортсмен олунньуга Алдаҥҥа тиийэн анаан сборданан кэлбитэ. Сноубордистар Төхтүр пааркатыгар дьарыктаммыттара. Горнай улууһа 2-с группаҕа баар, этэҥҥэ кыттыахпыт диэн эрэллээхпит, мэтээл кэлиэ диэн эрэнэбит.

Х х х

Ити курдук, ньурбалар биатлоҥҥа эрэ кыттар санаалаахтар. Барыта сэттэ спортсмен улуус чиэһин көмүскүө. Сэрэйдэххэ, талан-талан, сүүмэрдээн-сүүмэрдээн, хайаан да кыайар, миэстэлэһэр диэбит дьоннорун талан ылан ыытан эрдэхтэрэ.

Петр ПАВЛОВ.