Василий Егоров чемпионаты кыайыынан саҕалаата

Хабаровскайга Россия эр дьоҥҥо боксаҕа чемпионата саҕаланна. Чемпионакка дойду 60-ча регионуттан барыта 300-чэкэ күүстээх боксёр анал сүүмэрдээһини ааһан кыттыаҕа.

Саха сирин чиэһин бу күрэхтэһиигэ 12 боксёр көмүскүүр. Чемпионат бастакы күнүгэр түөрт ыйааһыҥҥа киирсиилэр буоллулар.

Бастакы күн саха боксаҕа кыһатын иитиллээччилэриттэн үс киһи рингэҕэ таҕыста. Ол курдук, Новосибирскайтан кыттар Хаҥаластан төрүттээх Николай Пшенников (60 кг) – Иван Горданы (С-Петербург) кыайда.

Билиҥҥи кэмҥэ тумус туттар боксербут, спорт үтүөлээх маастара Василий Егоров (51 кг) күүстээх утарсааччытын Артур Нагапетяны (Москва) бары өттүнэн баһыйа тутан, судьуйалар ааҕыыларынан 5:0 ахсаанынан хотто. Оттон Москва уобалаһын аатыттан кыттар Назар Андреевпыт (80 кг) дагестанец Ильяс Магомедовка (Дагестан) 1:4 ахсаанынан сабырыйтарда.

Чемпионат программатын быһыытынан сарсын, атырдьах ыйын 19 күнүгэр – 57, 63,5, 71 уонна 75 кг ыйааһыннаахтар бастакы киирсиилэрин оҥоруохтара.

Василий Егоров аны атырдьах ыйын 21 күнүгэр рингэҕэ тахсыаҕа. Утарсааччыта – уруккуттан эриһэр киһитэ, күүстээх боксёр Ахтем Закиров (Крым). Кини эмиэ бастакы эргииргэ утарсааччытын И.Хафизовы (Ставрополь) 5:0 кыайда.

Манна даҕатан эттэххэ, былырыын Читаҕа ыытыллыбыт Россия чемпионатыгар Василий Егоров – Ахтем Закировы финал чиэппэригэр кыайбыта (5:0) уонна чемпион үрдүк аатын ылбыта. Бу да сырыыга уолбутугар кыайыыны баҕарабыт.

Эһиги болҕомтоҕутугар “Дьулурҕан” архыыбыттан Василий Егоров – Ахтем Закиров былырыыҥҥы киирсиилэрэ:

Санатан эттэххэ, чемпионат бириискэ фондата – 26 мөлүйүөҥҥэ тэннэһэр. Чемпионнар 1,5-лыы мөл., үрүҥ көмүс призердар 250-нии тыһ., боруонса призердар – 125-тии тыһ. солк. харчынан наҕараадаланыахтара. Чемпионат киирсиилэрин «күөх экараҥҥа» МатчБоец уонна МатчТВ каналларга көрүөххэ сөп.

«Дьулурҕан».