Коркин-2023: Кыайыылаахтарга дьоһун наҕараадалар

Улуу тренер Дмитрий Петрович Коркин сырдык аатыгар көҥүл тустууга эр дьоҥҥо норуоттар икки ардыларынааҕы турнир үгэс быһыытынан сылын ахсын ыытыллар. Быйылгы турнир биһиги сүдү киһибит төрөөбүтэ 95 сылыгар ананар буолан, өссө ураты киэҥ далааһыннаах.

Мандат хамыыһыйатын үлэтин түмүгүнэн түһүлгэҕэ 15 дойдуттан уонна Россия 19 регионуттан барыта 178 бөҕөс күөн көрсөрө быһаарылынна. Ол курдук, тас дойдуттан – Армения, Азербайджан, Беларусь, Таджикистан, Кыргызстан, Казахстан, Монголия, Соҕуруу Корея, Индия, Иран, Турция, Молдова, Перу, Венесуэла бөҕөстөрө кэллилэр. Онтон дойду иһиттэн – Дагестан, Хотугу Осетия, Чечня, Бурятия, Тыва, Красноярскай, Кемерово, Санкт-Петербург курдук тустуу сайдыбыт республикаларыттан, куораттарыттан бөҕөстөр бааллар.

Көбүөргэ – 1 үтүөлээх маастар, 19 норуоттар икки ардыларынааҕы кылаастаах спорт маастара уонна 38 спорт маастара тахсан күөн көрсүөхтэрэ. Састаап үчүгэй, тыҥааһыннаах хапсыһыылары күүтэбит.

Түһүлгэ бириискэ фондата 8 мөл. солк. тэҥнэһэр. Ол курдук, ыйааһыннарыгар бастаабыттар – 300, иккис буолбуттар – 200 уонна үһүстээбиттэр 100-түү тыһ. солк. наҕараадаланыахтара. Онтон кыайыылааҕы бэлэмнээбит тренер 100 тыһ. солк. бэлиэтэниэҕэ.

Кыайыылаахтар сиэдэрэй оҥоһуулаах мэтээллэринэн, чемпионскай курдарынан наҕараадаланыахтара. Иккис, үһүс буолбуттар даҕаны мэтээллэрэ куһаҕана суох. Өссө, түһүлгэ бастыҥ бөҕөһүгэр анал статуэтка баар. Былырыын маннык бирииһи олимпийскай чемпион Заурбек Сидаков ылбыта. Быйыл дьэ ким ылар? Көрөргүт курдук, Д.П. Коркин турнирын наҕараадалара сылтан сыл ахсын оҥоһуулара тупсан иһэр.

Санатан эттэххэ, сарсын, балаҕан ыйын 7 күнүгэр тустуу сарсыарда 10:00 чаастан саҕаланар. Киириитэ – босхо, кэлиитэ – көҥүл.

Петр ПАВЛОВ.

Ааптар хаартыскаҕа түһэриитэ.