Сонуннар

Ахтан-санаан аастылар

Дьокуускай. Опера уонна балет государственнай театрыгар, саха норуотуттан бастакы олимпийскай чемпион, ССРС үтүөлээх маастара, Советскай Союз уонна Россия үтүөлээх тренерэ Роман Михайлович Дмитриев төрөөбүтэ 75 сылынан общественность үөрүүлээх мунньаҕа буолла.

Бэлиэ түгэҥҥэ Ил Түмэн депутата Алексей Еремеев, СР Правительствотын председателэ Кирилл Бычков, РФ спортивнай тустууга федерациятын толорооччу дириэктэрэ Роман Гайдуков, олимпийскай чемпион Павел Пинигин, олимпийскай призер Александр Иванов, Р.М. Дмитриев кэргэнэ Антонина Дмитриева тыл эттилэр.

Үөрүүлээх быһыыга-майгыга Алексей Еремеев – РФ спортивнай тустууга федерациятын көҥүл тустууга штабын начальнига, спорт үтүөлээх маастара Петр Юшановка уонна СР көҥүл тустууга кылаабынай тренеринэн үлэлээбит Александр Оконешниковка – Ил Түмэн махтал суруктарын, өйдөбүнньүк бэлиэлэрин туттартаата.

Ити курдук, бу тэрээһин кэмигэр, Кирилл Бычков уонна режиссер, сценарист Никита Аржаков – Роман Дмитриев туһунан уус уран киинэ үлэтэ саҕаламмытын биллэрдилэр.

Тэрээһин сүрүн чааһын кэнниттэн тута «Сулус буолан умайдын» диэн, Эдьигээн оройуонун олохтоохторун күүһүнэн Р.М. Дмитриев туһунан спектакль көрдөрүлүннэ.

Дьэ ити курдук, Саха сирэ бэйэтин улуу уолун үбүлүөйдээх бэлиэ түгэнин хас да күн үрдүк таһымнаахтык тэрийдэ.

Спорду таптааччылар, тустууну сэҥээрээччилэр! Кулун тутар 8-10 күннэригэр “Өрөгөй” Спорка киинигэр күргүөмүнэн көхтөөхтүк кэлэн бастакы олимпийскай чемпиоммут Роман Михайлович Дмитриев аатыгар Сүгүрүйүөҕүҥ, Саха сиригэр тустууну хайдах курдук таптыылларын Көрдөрүөҕүҥ, бэйэбит уолаттарбытыгар Ыалдьыаҕыҥ!..

Петр ПАВЛОВ.   

Ааптар хаартыскаҕа түһэриитэ.

Добавить комментарий

Ваш адрес email не будет опубликован. Обязательные поля помечены *

160225
Бүгүн : 125