Үөдэй оҕолоро инники күөҥҥэ

Олунньу 3-4 күннэригэр Дьокуускай куоракка 14-17 саастаах уолаттар уонна кыргыттар ортолоругар гиирэ спордугар өрөспүүбүлүкэҕэ биирдиилээн уонна хамаанданан бастыыр иһин күрэхтэһии буолан ааста. Барыта 135 эдэр спортсмен помостка таҕыста.

Улахан помостка Хаҥалас улууһун Үөдэй орто оскуолатыттан кыргыттарга: 58 кг – Светлана Петрова – иккис миэстэ (48 өрө аста), бу ыйааһыҥҥа Диана Прохорова – алтыс, оттон 63 кг – Александра Изотова – төрдүс миэстэҕэ таҕыстылар.

Үөдэй орто оскуолатыттан уолаттарга: 85 кг – Михаил Филиппов – 3-с миэстэ (икки көрүҥ түмүгүнэн), бу ыйааһыҥҥа Дмитрий Кельцинов – 6-с миэстэ, 63 кг – Кирилл Осипов – 8-с миэстэ, 58 кг – Ярослав Попов 27 кыттааччыттан – 9-с миэстэ буоллулар.

Покровскай куорат 1-кы №-дээх оскуолатыттан: 78 кг – Дьулурҕан Иванов – 1-кы миэстэ, 73 кг – Николан Иванов – 2-с миэстэ, 68 кг – Сандал Еремеев – 6-с миэстэни  ылары ситистилэр.

Хаҥалас улууһун сүүмэрдэммит хамаандата (сүрүн састаап Үөдэй орто оскуолатын үөрэнээччилэрэ) олус үчүгэйдик кыттаннар, II миэстэ буоллулар. Аны сайын ыытыллыахтаах Саха сирин үөрэнээччилэрин спартакиадатыгар кыттарга 8 путевканы ылары ситистилэр. Үөдэй орто оскуолатыгар Оксана Петрова тириэньэр-преподавателинэн үлэлиэҕиттэн гиирэ спорда тэтимнээхтик сайдар.

Уйбаан УЙГУУРАП.

Хаҥалас.