Тустуу кыһата кэрэ бэлиэ күнүн көрсөргө бэлэмнэнэр

Алтынньы саҥатыгар В.П. Керемясов аатын сүгэр Дьокуускай куорат 3 №-дээх оҕо спортивнай оскуолата тэриллибитэ 25 сылын туолар. Бу, бэйэтэ кэрэ бэлиэ түгэн. Ааспыт сыллары, үлэни-хамнаһы ырытыы, инники соруктары, былааннары туруоруу, бастыҥнары чиэстээһин үтүө кэмэ.

Билигин бу оскуола – куоракка, республикаҕа эрэ буолбакка, Россияҕа тиийэ бэйэтин үлэтинэн билиннэ диэтэхпитинэ сыыстарбаппыт буолуо. Бу оскуолаҕа элбэх чемпионнары, призердары иитэн-такайан таһаараллар.  

Оскуола ситиһиилэрэ:

Ааһан эрэр 2023 сылга В.П. Керемясов аатынан Дьокуускай куорат 3 №-дээх спортивнай оскуолата республикаҕа буолбут хамаанданан күрэхтэһиилэргэ барытыгар эрэллээхтик бастаан, инники сирдиир, угуйар, күн уотуттан күлүмүрдүү оонньуур сиэдэрэй кубоктарынан наҕараадаланна.

Ол курдук, 18-гар диэри саастаахтарга Н.Н. Тарскай аатынан күрэхтэһиигэ, 16-гар диэри саастаахтарга Дмитрий Данилов аатынан күрэхтэһиигэ, Ньурбаҕа (12 ыйааһынтан – 6 чемпион), Саха сирин үөрэнээччилэрин спартакиадатыгар, Боотурдар оонньууларыгар (17 чемпион) – барытыгар кыайыы, өрөгөй көтөллөннүлэр.

Оскуола бүгүҥҥү бастыҥнарынан “Азия оҕолоро” оонньуу, Россия призердара, Дальнай Восток, Саха сирин чемпионнара: Эрхан Куличкин, Дмитрий Павлов, Эрчим Жирков, Ариан Винокуров уо.д.а. буолаллар.

Оскуола күннэтэ тигинэччи үлэлиир. Ол курдук, бырагыраама быһыытынан үлэ күнүгэр сарсыардаттан чаастарынан араарыллан дьарык түөртэ тигинэччи ыытыллар. Дьарыктары үрдүк таһымнаах тренердэр салайан ыыталлар. Даҕатан эттэххэ, манна барыта куорат 570 оҕото тустуунан дьарыктанар, эрчиллэр.

Тэрээһиннэр:

Бу оскуолаҕа өрөбүл, сынньалаҥ диэн суоҕун кэриэтэ. Ол курдук, хас субуота, баскыһыанньа аайы араас таһымнаах күрэхтэһиилэр ыытыллаллар. Олох соторутааҕыта ССРС спордун маастара Борис Борисов кэриэһигэр, кини дьиэ кэргэнин көҕүлээһининэн бэртээхэй бириистэрдээх республикатааҕы турнир буолан ааспыта.

Ити курдук, бу саалаҕа – Дьокуускай куорат 7 уокуругун күрэхтэһиилэрэ сыллата ыытыллаллар. Оскуола тренердэрэ И.С. Кочкин уонна Е.И. Черкашин бириистэригэр күрэхтэһиилэр – саамай элбэх кыттааччыны түмэр күрэхтэһиилэринэн буолаллар. Ол курдук, аҥардас биир күрэхтэһиигэ 436 оҕо кыттан турар (!). Өссө Максим, Егор Крюковтар, Прокопий Федоров (Ньурба), Иван Николаевич Моисеев (Уус Майа) ааттарынан күрэхтэһиилэр бэрт тэрээһиннээхтик ыытыллыбыттара.

Маны тэҥэ Дьокуускай куорат оҕолорго саастарынан араарыллыбыт күрэхтэһиилэрэ тэриллэр. Ону таһынан бэтэрээннэргэ көҥүл тустууга республика чемпионата эмиэ бу оскуолаҕа тиһигин быспакка буолар.

Үбүлүөйдээх сыл үлэһиттэрэ:

Иллээх коллективка опыттаах үлэһиттэри тэҥэ эдэр дьон үлэлииллэр. Ол курдук, дириэктэринэн Саха Республикатын физическэй культураҕа уонна спорка туйгуна, хапсаҕайга спорт маастара Василий Васильевич Уйгуров үһүс сылын айымньылаахтык үлэлиир.

Дириэктэри үөрэх-иитии чааһыгар солбуйааччынан 2002 сылтан СР үөрэхтээһиҥҥэ үтүөлээх үлэһитэ, РФ физическэй культураҕа уонна спорка туйгуна, РФ уопсай үөрэхтээһиҥҥэ бочуоттаах үлэһитэ Николай Петрович Иванов; онтон дириэктэри дьаһалта-хаһаайыстыбаннай үлэҕэ солбуйааччынан көҥүл тустууга бэтэрээннэргэ РФ спордун норуоттар икки ардыларынааҕы кылаастаах маастара Василий Николаевич Алексеев кыһамньылаахтык үлэлииллэр.

Оскуола старшай тренеринэн Россия спордун маастара, Бүтүн Россиятааҕы категориялаах судьуйа Вячеслав Александрович Кривошапкин, тренердэринэн – СР спордун маастара Станислав Егорович Афанасьев (өссө кини Дьокуускай куорат хапсаҕайга хамаандатыгар эппиэттээх), ССРС спордун маастара, СР үтүөлээх тренерэ Никита Николаевич Никифоров (көҥүл тустууга Дьокуускай хамаандатын сүрүн тренерэ), ССРС спордун маастара, СР үтүөлээх тренерэ Михаил Михайлович Каженкин, РФ спордун норуоттар икки ардыларынааҕы кылаастаах маастара Николай Григорьевич Яковлев, СР үтүөлээх тренерэ, бэтэрээннэргэ аан дойду икки төгүллээх чемпиона Иннокентий Семенович Кочкин, Егор Иннокентьевич Черкашин (33 №-дээх оскуола тренерэ), ДЮСШ-3 бочуоттаах дириэктэрэ, бэтэрээннэргэ аан дойду чемпиона Федот Архипович Соловьев, тренердэр: Степан Семенович Соркомов (25 №-дээх оскуола), Петр Петрович Черкашин уонна Иван Иванович Соркомов (иккиэн Мархаҕа), Бүтүн Россиятааҕы категориялаах судьуйа Виктория Семеновна Барашкова, СР үтүөлээх тренерэ Дмитрий Дмитриевич Томскай биир санаанан үлэлииллэр.

Өйөөччүлэр, күүс-көмө буолааччылар:

Сыл устата элбэх күрэхтэһиини тэрийиигэ, оҕолор күрэхтэһиилэргэ барыыларын-кэлиилэрин, лааҕыр үлэтин, о.д.а. тэрээһиннэри ыытарыгар өрүү күүс-көмө, өйөбүл буолар тэрилтэлэргэ, салайааччыларга оскуола коллектива улахан махталлаах.

Ол курдук, сүрүн көмөнү Ил Түмэн депутата Иван Иванович Данилов салайааччылаах «Строительнай» рынок, «Стройиндустрия» тэрилтэ (генеральнай дириэктэр Егор Петрович Неустроев), ИП Зырянов IRON маҕаһыын, Дьокуускай куорат спортивнай тустууга федерацията (президент Руслан Михайлович Платонов), киин куорат физическэй культураҕа уонна спорка управлениета (начальник Эдуард Васильевич Ефимов) оҥороллор.

Ити курдук, куорат 25 №-дээх оскуолата (дириэктэр Иван Юрьевич Захаров), 33 №-дээх оскуолата (дириэктэр Прокопий Дмитриевич Батюшкин), Марха оскуолата (дириэктэр Мария Николаевна Стручкова), 21 №-дээх оскуола (дириэктэр Лидия Николаевна Шарапова), араас сылларга оскуолаҕа эрчиллибит дьон о.д.а. өрүү көмөлөһөллөр.

Үбүлүөй тэрээһиннэрэ:

Алтынньы 1 күнүгэр өрөбүлгэ күнүс 12:00 чаастан – оскуола иһигэр үөрүүлээх түгэн буолуоҕа. ДЮСШ-3 үбүлүөйүнэн сибээстээн республикатааҕы телевидениеҕа уонна радиоҕа тахсыы тэриллиэ. Алтынньы 5 күнүгэр СР Правительствотын 2 №-дээх дьиэтигэр 25 сыллаах кэрэ бэлиэ түгэни үөрүүлээхтик бэлиэтээһин буолуоҕа.

Ону тэҥэ алтынньы 28-29 күннэригэр ДЮСШ-3 25 сыллаах үбүлүөйүгэр аналлаах 2012-2013 сс. төрөөбүттэргэ Дьокуускай куорат көҥүл тустууга күрэхтэһиитэ уонна сэтинньи 24-25 күннэригэр В.П. Керемясов аатынан көҥүл тустууга киин куорат улахан дьоҥҥо чемпионата ыытыллыахтара.

25 сыллаах үбүлүөйгэ анаан Василий Васильевич Уйгуров уонна Федот Архипович Соловьев бэлэмнээһиннэринэн Дьокуускай куорат 3 №-дээх спортивнай оскуолатын историятын көрдөрөр, кэпсиир кинигэ оҥоһуллан таҕыста.

Петр ПАВЛОВ.