Ярыгин-2024: Ньургун Сергин финал чиэппэригэр таҕыста

Красноярскай. «Иван Ярыгин Кубога» спортивнай тустууга норуоттар икки ардыларынааҕы турнир үһүс күнүгэр күрэхтэһиини түөрт спортсмеммыт саҕалаата. Син атыттар курдук, кинилэр кыттыыларын билиһиннэрэбит.

92 киилэҕэ икки кыттааччылаахпыт. Максим Толмачев дагестанец Асхаб Саадулаевка хотторон кэбистэ.

Онтон Ньургун Сергин – былырыыҥҥы И.Ярыгин турнирын кыайыылааҕын, Россия чемпионатын призерун Алан Багаевы 3:2 ахсаанынан кыайан, биир дойдулаахтарын үөртэ. Салгыы тустууга кини Е.Сергеевы (Чувашия) хотон, аны финал чиэппэригэр дагестанец О.Зиятдиновы кытта тустар буолла.

74 киилэҕэ республика чемпионатын призера Николай Сивцев бастаан быһа кыайыыны сурунна. Кини утарсааччыта молдован Кречун көбүөргэ тахсыбата. Ол оннугар салгыы күрэхтэһиигэ Николай, бу ыйааһын биир бастыҥа Тимур Бижоевка утарыласпата. Сэрэйдэххэ Бижоев финалга тахсыан сөп.

Онтон дьахталлар тустууларыгар Лилияна Рожина кыргыз кыыһын очукуонан кыайан иһэн, албаска түбэһэн, ыраастык баран хаалла.

Спортсменнарбыт тустуулара:

92 кг Максим Толмачев – А.Саадулаев (Дагестан) 0:10

92 кг Ньургун Сергин – А.Багаев (ХМАО) 3:2

74 кг Николай Сивцев – Е.Кречун (Молдова) + –

68 кг Лилияна Рожина – Г.Таштанбекова (Кыргызстан) ыраас хотторуу

92 кг Ньургун Сергин – Е.Сергеев (Чувашия) 3:0

74 кг Николай Сивцев – Т.Бижоев (КБР) 0:11.

Күрэхтэһии салҕанар. Биһиги сайтпытын кэтээн көрө сылдьыҥ.

Петр ПАВЛОВ.