Гребневтэри үйэтитэр түһүлгэҕэ 503  бөҕөс

Покровскайга көҥүл тустууга аҕалыы уол Геннадий Васильевич уонна Олег Геннадьевич Гребневтэр сырдык кэриэстэригэр, «Якутцемент» Производственнай холбоһук бирииһигэр хамаанданан уонна биирдиилээн бастыыр иһин күрэхтэһии, улаатан эрэр 2009-2010 уонна 2011-2012 сыллаах төрүөх уолаттарга, Леонид Спиридонов аатынан Тустуу саалатыгар олунньу 13-14 күннэригэр буолла. Күрэхтэһиигэ 20 хамаандаттан 503 үүнэн иһэр бөҕөстөр күөн көрүстүлэр.

Күндү дьонун аҕатын уонна убайын туһунан турниры тэрийээччи Сергей Гребнев: “Аҕам Геннадий Васильевич Ленин уордьаннаах Москватааҕы үрдүкү судаарыстыбаннай физическэй култуура уонна спорт институтун ситиһиилээхтик бүтэрбитэ.  Көҥүл тустууга Москва куорат чөмпүйүөнэ, Орджоникидзевскай оройуонугар ССРС спордун биир бастакы маастара этэ. Оттон убайым Олег кыра эрдэҕиттэн спорду таптыыра. Кини көҥүл тустууга араас турнирдар призердара уонна чөмпүйүөнэ этэ. Спорт маастарыгар кандидат нуорматын толорбута. 2003 с. аҕабыт курдук тириэньэринэн үлэтин саҕалаабыта, онтон спорду салайан ситиһиилээхтик үлэлээбитэ. Манна тустубут оҕолортон инникитин эмиэ үгүс чөмпүйүөннэр үүнэн тахсыахтара, киһи быһыытынан үтүө дьон буолуохтара” – диэн ахтан ааста.

Кэскиллээх бөҕөстөр кыайыыга дьулуһан, харахтара уоттанан туран туһуннулар.  Улууспут оҕолоро тусталларын, түһүлгэни көрө олорон сыаналаатахха, киһи бу чаҕылхай оҕо сылдьар эбит диэн этэр уустук. Икки сааһынан бөлөххө сытыы киирсиилэр, бырахсыылардаах тустуулар буоллулар. Ким элбэх албастаах, кыайыыга дьулуурдаах – ол бастаата.

Күрэхтэһиини  Саха Өрөспүүбүлүкэтин 16 саастарыгар диэри уолаттарга сүрүннүүр тириэньэр Кузьма Сивцев кыраҕытык кэтээн көрдө, инники былааннарын торумнаата, санаатын үллэһиннэ:

–14-15 саастаах уолаттар, инникитин Сахабыт сирин сүүмэрдэммит хамаандатыгар киириэхтэрэ. Онно сыаллаан бу күрэхтэһиини Сергей  Гребневтиин, Ил Түмэн дьокутаата Алиш Мамедовтыын сүбэлэһэн тэрийдибит. Бу саастарыгар сылдьар тустуук оҕолорго Уһук Илиҥҥи эрэгийиэҥҥэ, Арассыыйаҕа да бастыыр күрэхтэһиилэр суохтар.  Ол да буоллар, тириэньэрдэр састааптарын хамаандалара бу турнир кэнниттэн сүүмэрдиир эрчиллиилэри ыытарга былаанныыбыт. Бу күрэхтэһиигэ кыттыбыт бары улуустарга үчүгэйдик тустар оҕолор бааллар эбит. Билигин 4-6-с кылаастарга үөрэнэ сылдьар оҕолорго болҕомтотубут күүскэ уурдахпытына, биһиги ыытар үлэбит бары хайысхатыгар бары саастарынан бөлөхтөргө табыгастаах уонна тахсыылаах буолуоҕа. Биһиги кыра саастаах уолаттары эрчийэр-дьарыктыыр тириэньэрдэр, үүнэн турар чиргэл тиит мас силиһэ уонна мутуга буолабыт, – диэтэ.

12-13 саастаах бөҕөстөр ортолоругар кыайыылаахтарынан буоллулар:

26 кг – 28 кыттааччы баар, манна Хаҥалас тустууга оскуолатын иитиллээччитэ Оскар Громов бастаата (тириэньэрэ В.Романов).

28 кг – 35 бөҕөс тустубутуттан, Дьокуускай куораттан Диас Сергеев пьедестал үрдүкү үктэлигэр таҕыста (тириэньэрдэрэ Дь.Сивцев, А.Прохоров, Н.Сивцев).

30 кг – 42 тустууктан кыайыылааҕынан Өймөкөөнтөн Александр Винокуров буолла. (тириэньэрэ В.Саввинов).

32 кг – 43 киһиттэн Эрнест Семенов Чурапчы чулуута бастыҥ тустууну көрдөрдө (тириэньэрэ С.Санников).

35 кг – саамай элбэх 63 кэскиллээх бөҕөс тустубутугар кыайыылааҕынан күөх Ньурбаттан Эльдар Алексеев чөмпүйүөн аатын ылла (тириэньэрэ Р.Окоемов).

38 кг – 43 кыттааччы баара, манна барыларын хотон Чурапчыттан Марат Яковлев бастаата (тириэньэрэ А.Аржаков).

41 кг – 37 бөҕөс тустубутуттан кыайыылааҕынан Уус Алдантан Дамир Хобров буолла (тириэньэрэ И.Пантилов).

44 кг – 28 тустуук көбүөргэ тахсыбытыттан бастыҥ тустуугунан Сайан Ксенофонтов ааттанна (тириэньэрдэрэ П.Черкашин, И.Соркомов).

48 кг – 29 бөҕөс түһүлгэҕэ киирбититтэн кыайыылааҕынан таҕыста Алеша Парников Нам улууһа (тириэньэрэ И.Обутов).

52 кг – 21 кыттааччы баара, манна чөмпүйүөн үрдүк аатын Мэҥэ Хаҥаластан Сергей Мохначевскай ылла (тириэньэрэ В.Яковлев).

55 кг – 10 киһиттэн Мэҥэ Хаҥаластан Егор Баишев бастаата (тириэньэрдэрэ А.Винокуров, И.Белолюбскай).

60 кг ыйааһыннаах уолаттарга 15 уол тустубутуттан кыайыылааҕынан Айсен Петров Үөһээ Бүлүүттэн буолла уонна чөмпүйүөн лиэнтэтин кэттэ (тириэньэрэ В.Литвинов).

60 кг үөһэ ыйааһыннаах бухатыыр уолаттарга көбүөргэ 26 бөҕөс тустубутуттан, Нам улууһуттан Леонид Тимофеев чөмпүйүөннээтэ (тириэньэрэ И.Обутов).

14-15 саастаах бөҕөстөр ортолоругар кыайыылаахтарынан буоллулар:

41 кг – 16 бөҕөс көбүөргэ тахсыбыттан кыайыылааҕынан Хаҥалас улууһуттан Дьулустан Капитонов буолла (тириэньэрдэрэ Г.Дмитриев, И.Сысолятин).

52 кг – 31 кыттааччыттан Айсен Захаров Дьокуускай куораттан бастаата (тириэньэрдэрэ У.Кривошапкин, Ф.Соловьев).

57 кг – 12 тустуугу кыайан Хаҥаластан Мичил Соловьев чөмпүйүөннээтэ (тириэньэрдэрэ Г.Дмитриев, Ю.Афанасьев).

62 кг ыйааһыннаах  бөҕөстөргө 13 тустуук баара, барыларын кыайталаан Арылхан Кононов Хаҥалас улууһа бастаата (тириэньэрдэрэ Г.Дмитриев, Ю.Афанасьев).

85 кг – 10 бөдөҥ бөҕөс тустубутуттан кыайыылааҕынан түһүлгэ хаһаайына Айхан Кривошапкин буолла, Хаҥалас улууһа (тириэньэрэ Г.Дмитриев).

Гребневтэр дьиэ кэргэттэрэ Супер бириистэрин 100 тыһ солкуобайы үөрүүлээх быһыыга-майгыга 85 кг ыйааһыннаах бөҕөстөргө бастаабыт эрэлбитигэр Айхан Кривошапкиҥҥа, «Якутцемент» Производственнай холбоһук генеральнай дириэктэрэ, Ил Түмэн дьокутаата Мамедов Алиш Забид-оглы Нөмүгүттэн сылдьар 57 кг бастаабыт Мичил Соловьевка 75 тыһ. солк. туттардылар. Бары миэстэлэспит оҕолор чөмпүйүөн лиэнтэтинэн, грамотанан уонна харчынан бириис туттулар.

Түмүккэ Дьокуускай куорат хамаандата бастаата (хапытаан Степан Соркомов), иккис миэстэҕэ Мэҥэ Хаҥалас (хамаанда хапытаана Яков Филиппов) уонна үһүс бочуоттаах миэстэҕэ Чурапчы улууһун ( хапытаан Михаил Явловскай) хамаандалара таҕыстылар, куубагынан наҕараадаланнылар. Сахабыт сирин аатырдыахтаах  бөҕөстөр түһүлгэттэн үүнэн-тахсан иһэллэр.

Уйбаан УЙГУУРАП.

Ааптар хаартыскаҕа түһэриитэ.