Тарскай-2024: Көбүөргэ 190 бөҕөс тахсыа

Эрдэ этэн аһарбыппыт курдук, сарсыҥҥыттан Бороҕоҥҥо, уолаттарга Н.Н. Тарскай бирииһигэр республика үрдүнэн биирдиилээн уонна хамаанданан бастыыр иһин күрэхтэһии саҕаланар. Онтон бүгүн мандат хамыыһыйата үлэлээтэ уонна бары ыйааһыннарга сэрэбиэй оҥоһулунна.

Быйылгы, Н.Н. Тарскай төрөөбүтэ 100 сылыгар анаммыт күрэхтэһиигэ 17 хамаандаттан 190 эдэр бөҕөс күөн көрсүө. Ол курдук, Амма, Үөһээ Бүлүү, Бүлүү, Горнай, Кэбээйи, Мэҥэ Хаҥалас, Нам, Нерюнгри, Ньурба, Өймөкөөн, Орто Халыма, Сунтаар, Таатта, Уус Алдан, Хаҥалас, Чурапчы, Дьокуускай кытталлар. Манна сыһыары тутан эттэххэ, Мэҥэ Хаҥалас, Уус Алдан уонна Дьокуускай толору састаабы туруорбуттар. Дьэ ханнык хамаанда бастыыр?

Күрэхтэһии, аҕыйах хонуктааҕыта түмүктэммит республика улахан дьоҥҥо чемпионата буолбут Н.Н. Тарскай аатынан Спорт дыбарыаһыгар икки көбүөрүнэн ыытыллар.

Күрэхтэһии кылаабынай судьуйатынан норуоттар икки ардыларынааҕы категориялаах судьуйа Петр Соловьев, кылаабынай секретарынан П.С. Друзьянов үлэлиэхтэрэ.

«Дьулурҕан».