Саха бөҕөстөрө Ярыгин турнирыгар ситиһиилэрэ

Икки төгүллээх олимпийскай чемпион, ССРС, Европа, аан дойду чемпиона, спорт үтүөлээх маастара уонна тренерэ Иван Ярыгин аатынан көҥүл тустууга норуоттар икки ардыларынааҕы турнир 1990 сыллаахтан тэриллэр. Бастакы күрэхтэһии Абакаҥҥа буолбута, онтон 1991 сылтан саҕалаан наар Красноярскай куоракка ыытыллар. 1999 сылтан турнир Гран-при таһымын сүкпүтэ. 2023 сылтан турнир “Иван Ярыгин кубога” диэн ааттанар.

Тустуу эйгэтигэр “аан дойду аччыгый чемпионатынан” ааттанар түһүлгэҕэ Саха сирин бөҕөстөрө эриэ-дэхси көрдөрүүлээхтэр. Ол курдук, Петр Юмшанов – 1993, Ньургун Иванов – 1994, Александр Контоев – 2002, 2005, Виктор Лебедев – 2015, Ньургун Скрябин – 2016, Арыйаан Тютрин – 2021, Виктор Рассадин – 2022 сылларга Иван Ярыгин аатынан турнир кыайыылаахтарынан буолбуттара.

Бу күҥҥэ биир дойдулаахтарбыт Красноярскайдааҕы турниртан – 8 кыһыл көмүс, 13 үрүҥ көмүс уонна 19 боруонса мэтээллээхтэр, ол аата, барыта 40 наҕараада. Ити эр дьоҥҥо. Ону таһынан дьахталлар тустууларыгар Екатерина Мельникова, Севиль Назарова – иккис, Екатерина Новицкая, Анастасия Шавлинская, Алина Казымова, Александра Карамзина уонна Севиль Назарова – үһүс миэстэлэнэ сылдьыбыттара. Онон барыта бу күҥҥэ саха тустууга кыһата Ярыгин турнирыттан 8 кыһыл көмүс, 15 үрүҥ көмүс, 23 боруонса мэтээллээх.

Оттон саха бөҕөстөрүттэн бу турнир саамай элбэх мэтээлин ким ылбытай диир буоллахха, Виктор Лебедев биир кыһыл көмүс (2015), биир үрүҥ көмүс (2009) уонна икки боруонса (2010, 2015) мэтээллээх. Оттон Петр Юмшанов, Александр Контоев, Виктор Рассадин үстүү мэтээллээхтэр.

Красноярскайдааҕы турнирга саха бөҕөстөрүн ситиһиилэрэ:

1990 – Сергей Степанов (48 кг), Владимир Торговкин (52 кг) – иккис миэстэ.

1991 – Николай Яковлев (57 кг) – иккис миэстэ.

1993 – Петр Юмшанов (48 кг) – бастакы миэстэ, Герман Контоев (52 кг) – иккис миэстэ.

1994 – Ньургун Иванов (48 кг) – бастакы миэстэ, Владимир Торговкин (48 кг), Алексей Варламов (52 кг), Артур Федоров (57 кг) – иккис миэстэ.

1995 – Петр Юмшанов (48 кг) – иккис миэстэ, Алексей Варламов (52 кг) – үһүс миэстэ.

1996 – Петр Юмшанов (48 кг), Артур Федоров (57 кг) – үһүс миэстэ.

1998 – Андрей Яковлев (63 кг) – иккис миэстэ.

2002 – Александр Контоев (54 кг) – бастакы миэстэ.

2003 – Александр Контоев (55 кг) – үһүс миэстэ.

2005 – Александр Контоев (55 кг) – бастакы миэстэ, Леонид Спиридонов (66 кг) – үһүс миэстэ.

2007 – Николай Старостин (55 кг) – үһүс миэстэ.

2009 – Виктор Лебедев (55 кг), Екатерина Мельникова (63 кг) – иккис миэстэ, Екатерина Новицкая (59 кг) – үһүс миэстэ.

2010 – Виктор Лебедев (55 кг) – үһүс миэстэ.

2011 – Анастасия Щавлинская (67 кг) – үһүс миэстэ.

2014 – Владимир Флегонтов (57 кг) – иккис миэстэ, Николай Ноев (57 кг) – үһүс миэстэ.

2015 – Виктор Лебедев (57 кг) – бастакы миэстэ, Ньургун Скрябин (57 кг), Егор Пономарев (61 кг) – үһүс миэстэ.

2016 – Ньургун Скрябин (61 кг) – бастакы миэстэ, Виктор Лебедев (61 кг) – үһүс миэстэ.

2017 – Виктор Рассадин (61 кг) — үһүс миэстэ.

2019 – Николай Охлопков (61 кг) – иккис миэстэ, Эдуард Григорьев (61 кг) – үһүс миэстэ.

2020 – Арыйаан Тютрин (57 кг) – үһүс миэстэ.

2021 – Арыйаан Тютрин (57 кг) – бастакы миэстэ, Виктор Рассадин (70 кг) – иккис миэстэ, Ньургун Сергин (92 кг) – үһүс миэстэ. Итиэннэ Севиль Назарова иккис, Алина Казымова үһүс миэстэ.

2022 – Виктор Рассадин (70 кг) – бастакы миэстэ.

2023 – Константин Капрынов (70 кг), Севиль Назарова (55 кг), Александра Карамзина (50 кг) – үһүс миэстэ.

2024 – Айсен Потапов (70 кг), Никита Хабаров (125 кг) – үһүс миэстэ.

Петр ПАВЛОВ.