Сонуннар

Александр Оконешников: “Саҥа былааннар үөскээннэр, дуоһунаспын босхолуур буоллум”

Саха Республикатын көҥүл тустууга сүүмэрдэммит хамаандатын кылаабынай тренерэ Александр Оконешников бүгүн Инстаграмҥа бэйэтин страницатыгар, дуоһунаһыттан тохтуурун туһунан суруйда:

Саха сирин тустууга хамаандатын сүрүн тренерин дуоһунаһыгар 4 сыл кэриҥэ үлэлээн кэллим. Саҥа былааннар үөскээннэр, бу дуоһунаһы босхолуур буоллум. Бу сылларга араас таһымнаах күрэхтэһиилэртэн биһиги тустууктарбыт мэтээллэри аҕаллылар. Ол курдук, Европа чемпиона уонна призердара, Аан Дойду призера, Олимпиада кыттыылааҕа, Россия чемпионатыттан призердар, Ярыгин чемпионнара уонна призердара, ыччаттарга Россия первенствотыттан 12 сыл буолан баран 3 сыл субуруччу чемпионнар уонна призердар, студеннар Универсиадаларын чемпиона уонна призердара үүнэн таҕыстылар. Н.Н. Тарскай аатынан республика чемпионата үрдүк таһымҥа ыытыллар буолла.

Бу дуоһунаска итэҕэйэн үлэлэппит Леонид Николаевич Спиридоновка, Иннокентий Юрьевич Григорьевка махтанабын! Махтаныам этэ бииргэ үлэлээбит хамаандам тренердэригэр, спортсменнарбар, ЦСП «Триумф» коллективыгар, дириэктэрбитигэр Пахомов Михаил Дмитриевичка!

Махтанабын биһиги болельщиктарбыгар, спонсордарбытыгар! Барыгытыгар бу Саҥа сылга баҕарыам этэ санаабыккыт сатаннын, толкуйдаабыккыт туоллун, уһун дьоллоох олоҕу! Саҥа дьылынан, саҥа дьолунан! Саха тустуута сайда турдун, кыайыылар кэлэн истиннэр!

PS: Александр Оконешников. Сааһа 41-рэ. Көҥүл тустууга Россия спордун маастара. Студеннарга Россия чемпиона (2007), РФ Кубогын үрүҥ көмүс призера (2008), Бурятия президенин бирииһигэр норуоттар икки ардыларынааҕы турнир кыайыылааҕа (2001), Дмитрий Коркин кэриэһигэр Бүтүн Россиятааҕы турнир икки төгүллээх үрүҥ көмүс призера (2006, 2007), Дальнай Восток биэс төгүллээх чөмпүйүөнэ (2004, 2005, 2006, 2007, 2008), Николай Тарскай кэриэһигэр Саха сирин чемпионатын үс төгүллээх кыайыылааҕа (2003, 2005, 2006).

2011 сыллаахха Өймөкөөн Томторун спорка оскуолатын дириэктэринэн үлэлээбитэ. Онтон 2013-2014 сс. – Өймөкөөн улууһун спорка управлениетын начаалынньыга. 2014-2017 сылларга Республикатааҕы оҕо спордун управлениетыгар отдел начаалынньыга. ХИФУ спорка уонна Үп-экономика институттарын үөрэнэн бүтэрбитэ. Өссө Россия президенин иһинэн Судаарыстыбаннай сулууспа Академиятыгар үөрэммитэ. Кэргэннээх, түөрт оҕолоох.

Александр Савельевич оннугар билигин республика тустууга хамаандатын сүрүн тренерин эбээһинэһин толорооччунан Вадим Семенов ананна.

“Дьулурҕан”.

 

Добавить комментарий

Ваш адрес email не будет опубликован. Обязательные поля помечены *

137679
Бүгүн : 143