Мээчик тыаһа түүн үөһүгэр диэри тиҥийэн олордо

Эмчит идэлээх Александра Семеновна Васильева сырдык кэриэһигэр волейболга дьахталлар хамаандаларын икки ардыларыгар турнирга Орто Халыматтан, Уус Алдантан, Мэҥэ Хаҥаластан, Хаҥаластан уонна Дьокуускай куораттан спортивнай кулууптар волейболистара кытыннылар. Күрэхтэһии икки сиринэн: Леонид Спиридонов аатынан спортсаалаҕа уонна Спорт дыбарыаһыгар тэрээһиннээхтик ыытылынна.

Александра Семеновна үс сыллааҕыта олохтон хомолтолоохтук, суол быһылааныгар түбэһэн суох буолбута. Манна кини тэрийбит “Медик” хамаандата оонньоото.

Күрэхтэһиини тэрийиигэ Хаҥалас улууһун Киин балыыһатын кэлэктиибэ, Доруобуйа харыстабылын идэлээх сойуустарын өрөспүүбүлүкэтээҕи кэмитиэтэ, урбаанньыттар Сергей Черняк, Валентин Латышев, “Товары все для дома” атыы-эргиэн дьиэтэ күүс-көмө буоллулар. Итини сэргэ оскуолаҕа бииргэ үөрэммит оҕолоро, чугас дьүөгэлэрэ көмөлөстүлэр.

Александра Семеновна волейболу, чуолаан спорду олус сөбүлүүрэ. Дьону-сэргэни чөл олоххо көҕүлүүрэ. Сырдык аата сыдьаайа турдун!

Спорду, чуолаан волейболу өрө туппут дьон Эргэ Саҥа дьылы көрсө, түүн 3:30 диэри тура тэбинэн туран сындалыйбакка, сылайбакка оонньоотулар.

Хас биирдии хамаанда оонньооччулара, спортивнай майгыларынан, дьүккүөрдэринэн сытыы бысыһыылардаах, күүстээх охсуулардаах, быһа биэриилэрдээх, бэрт үчүгэй комбинациялардаах оонньуулары көрдөрдүлэр. “А” бөлөххө көрсүбүт хамаандаларын 2:0 ахаанынан эрэллээхтик кыайталаан, Дьокуускай куораттан “Саха Бэчээт” хамаандата бастаата. Иккис миэстэни Мэҥэ Хаҥалас улууһуттан “Мэҥэ” хамаандата ылла. Үһүс миэстэҕэ Хаҥалас бэтэрээннэрин хамаандата таҕыста.

“Б” бөлөххө Мэҥэ Хаҥалас хамаандата бастаата. Иккис Дьокуускай куораттан “Олимп” уонна үһүс бочуоттаах миэстэҕэ Дьокуускайдааҕы научнай киин күүстээх оонньооччулара тигистилэр. Турнир бастыҥ оонньооччуларынан Дьокуускай куораттан, “Виктория” хамаандаттан Мария Васильева, “Саха Бэчээт” хамаандаттан Майя Бережнова, Уус Алдан хамаандатыттан Светлана Иванова уонна Лариса Жиркова ааттаннылар.

Александра Семеновна чугас дьонноро, аймахтара күрэхтэһиини долгуйа көрдүлэр. Тэрийээччилэргэ чуолаан Сарыалла Айылгылаахха, Айталина Потаповаҕа, Варвара Соломоноваҕа, бары кыттыбыт волейболисткаларга уонна Александра Семеновна дьүөгэлэригэр, бииргэ үөрэммит оҕолоругар, бирииһинэн көмөлөспүт дьоҥҥо ис сүрэхтэриттэн махтал истиҥ тылларын эттилэр.

Турнир сыллата буола турарыгар, Александра Семеновна аата умнуллубатыгар баҕара хааллылар.

Уйбаан УЙГУУРАП. Покровскай.

Ааптар хаартыскаҕа түһэриитэ.