Сонуннар

«Коркинныы олоруохха! Коркинныы айыахха!»

Итинник ааттаах, биһиги сүдү киһибит – ССРС, РСФСР, Саха АССР үтүөлээх тренерэ, Саха сирин үтүөлээх учуутала Дмитрий Петрович Коркин төрөөбүтэ 95 сылыгар аналлаах республикатааҕы быыстапка уон күн устата «Строительнай» Атыы-эргиэн киинин быыстапкалыыр саалатыгар дьоҥҥо-сэргэҕэ анаан көрдөрүүгэ турда.

Маннык, бэһис быыстапка тэрээһинин Саха Республикатын культуратын үтүөлээх үлэһитэ Татьяна Афанасьевна Гоголева үүннээн-тэһииннээн тэрийэн ыытта. Улахан иитэр-өйдөтөр сыаллаах быыстапка үрдүк тэрээһиннээхтик ыытыллан, сыалын-соругун ситистэ.

Манна Эдьигээн, Чурапчы, Амма, Үөһээ Дьааҥы улуустара, Ем.Ярославскай аатынан республикатааҕы музей, А.С. Пушкин аатынан республикатааҕы библиотека, Р.М. Дмитриев аатынан Олимпийскай эрэл училищета, Бөтүрүөбүс биир санаалааҕа Константин Сергеевич Постников мунньууларын кини кыыһа Саргылана Константиновна, Амматааҕы Н.С. Захаров-Сахаачча аатынан музей экспонаттарын, Сахаачча балта Анна Семеновна, Д.П. Коркин үөрэнээччитэ, тустуу туһунан кинигэлэр ааптардара Дмитрий Афанасьевич Егоров, олимпиец Александр Николаевич Иванов, спорт үтүөлээх маастара Василий Николаевич Гоголев, спорт бэтэрээнэ Михаил Егорович Друзьянов, фотограф, суруналыыс Григорий Григорьевич Турантаев (Чурапчы), коллекционердар Платон Эверстов, Юрий Щукин, уо.д.а. баай ис хоһоонноох быыстапканы туруордулар.

Өскөтүн, быыстапканы, өссө Д.П. Коркин төрөөбүт күнүгэр – балаҕан ыйын 5 күнүгэр Саха Республикатын физическэй культураҕа уонна спорка миниистирэ Леонид Николаевич Спиридонов үөрүүлээх быһыыга-майгыга аспыт эбит буоллаҕына, ый 14-с чыыһылатыгар – быыстапканы түмүктүүр тэрээһиҥҥэ СР физическэй культураҕа уонна спорка миниистирин бастакы солбуйааччы Александр Николаевич Бугаев кытынна. Кини быыстапка тэрээһинигэр көхтөөхтүк кыттыбыт дьоҥҥо наҕараадалары, өйдөбүнньүк бэлэхтэри туттарда.

Бу уон күн устата киэҥ былааннаах үлэ ыытылынна. Ол курдук, элбэх көлүөнэнэн истиҥ көрсуүһүүлэр буоллулар, саҥа тахсыбыт кинигэлэр сүрэхтэниилэрэ ыытылынна, сэргэх сэһэргэһиилэр, кылаас чаастара тэрилиннилэр. Быыстапканы куорат олохтоохторо уонна ыалдьыттара сэргии көрдүлэр, иһиттилэр.

Кыттааччылар эһиил өссө үчүгэйдик бэлэмнэнэн кэлэн кыттарга улахан былааннаах тарҕастылар.

Бу улахан тэрээһин ыытыллыытын өйөөбүт, күүс-көмө буолбут «Строительнай» рынок салайааччыта Иван Иванович Даниловка, быыстапка кыттыылаахтара бары биир санаанан махталларын эттилэр.

Петр Павлов.

 

Ааптар хаартыскаҕа түһэриилэрэ.      

Добавить комментарий

Ваш адрес email не будет опубликован. Обязательные поля помечены *

176515
Бүгүн : 81