Бу өрөбүлгэ – куорат тустуута!

Ахсынньы 9-10 күннэригэр – ССРС спордун маастара, Саха Республикатын үтүөлээх тренерэ, Россия физическэй культураҕа уонна спорка үтүөлээх үлэһитэ Валерий Петрович Керемясов кэриэһигэр көҥүл тустууга Дьокуускай куорат аһаҕас чемпионата ыытыллар.

Чемпионат, Саха сиригэр физкультура хамсааһын 100 сылыгар, В.П. Керемясов аатынан киин куорат 3 №-дээх спортивнай оскуола 25 сылыгар уонна дойдуга – Педагог, наставник сылларыгар ананар.

Санатан эттэххэ, былырыын маннык чемпионакка бастаабыттара: 57 кг – Петр Копылов, 61 кг – Александр Авелов, 65 кг – Айхаан Антонов, 70 кг – Константин Капрынов, 74 кг – Айсен Потапов, 79 кг – Герман Устинов, 86 кг – Айсен Копырин, 92 кг – Ньургун Сергин, 97 кг – Сергей Семенов, 125 кг – Никита Хабаров. Быйыл даҕаны састаап күүстээх буоларын кэтэһэбит.

Тэрийээччилэр биллэрбиттэринэн түһүлгэҕэ сүүмэрдэммит хамаандаттан Никита Хабаров, Александр Авелов, Олег Фомин, Айаал Белолюбскай, Уйгулаан Иванов, Петр Константинов, Яков Павлов, Чурапчыттан Артем Слепцов, Василий Кириллин, Кирилл Мордовской, Олимпийскай эрэл училищетыттан Николай Охлопков, Игорь Матвеев уо.д.а. күүстээх бөҕөстөр кыттыахтара. Ону тэҥэ алта монгол баатырдара бааллар. Кинилэр ортолоругар – аан дойду чемпионатын призера Туменбилег Тувшинтулга.

Онон тустууну суохтаабыт дьон сытыы, тыҥааһыннаах хапсыһыылары көрөргө эрэнэбит. Чемпионат М.К. Аммосов аатынан Хотугулуу Илиҥҥи федеральнай университет Тустууга саалатыгар (Дьокуускай, Каландаришвили 17, Г блок) ыытыллар.

Чемпионат программата:

Ахсынньы 9 күнэ, субуота

14:00-16:30 Мандат комиссиятын үлэтэ.

16:30-17:00 Судьуйалыыр комиссия тренердэри, хамаандалар бэрэстэбиитэллэрин кытта сүбэ мунньаҕа.

17:00-18:00 Бары ыйааһыннарга сэрэбиэй.

Ахсынньы 10 күнэ, өрөбүл

08:00-08:30 Медицинскэй көрүү уонна кыттааччылар ыйааһыннаныылара.

10:00-12:00 Бары ыйааһыннарга барыллааһын хапсыһыылар.

12:00-12:30 Чемпионаты үөрүүлээхтик аһыы.

12:30-18:00 Чемпионат салгыыта. Финаллар. Наҕараадалааһын.

«Дьулурҕан».