Сунтаар эһигини ыҥырар

Кистэл буолбатах, кэнники кэмнэргэ биһиги Сунтаарбыт улууһугар өрөспүүбүлүкэ таһымнаах улахан күрэхтэһиилэр буолбат буолбуттара баар чахчы. Биир дойдулаахпыт А.К. Акимов өрөспүүбүлүкэ вице-бирисидьиэнниирин саҕана күүскэ үлэлэһэн туттарбыт манежтаах «Алмаз» стадионугар 2006 с. оннооҕор Саха сирин норуоттарын алтыс Спортивнай оонньуулара үрдүк таһымнаахтык ыытыллыбыттара.

Ол тутуулар билигин төһө да эргэрдэллэр, өрөспүүбүлүкэ таһымнаах ханнык баҕарар күрэхтэһиини ыытарга эппиэттэһэллэр, дии саныыбыт. Сунтаарга улахан күрэхтэһиилэри ыыппат буолуу биир сүрүн сылтаҕынан, Сунтаар олус ырааҕа диэн буолар эбит. Кырдьык, ырааҕын ыраахпыт. Оттон оннооҕор биһиги оҕолорбут араас күрэхтэһиилэргэ салгымтыата суох баран-кэлэн, кыттан кэллэхтэрэ дии. Айан араастаах буолара биллэр. Ардыгар субу оптуобустан түһээт ыйааһыҥҥа сүүрэриҥ, сүүрэр суолга турарыҥ баар чахчылар этэ. Онон биһиги, сунтаардар киинтэн ыраахпыт суотугар улахан ночооттоохпут.

Урукку өттүгэр өрөспүүбүлүкэ таһымнаах араас күрэхтэһиилэр син буолаллара. Ол курдук, көҥүл тустууга Арассыыйа 4 чөмпүйүөнүн, биирдиилээн биллиилээх спортсменнарбыт бириистэригэр күрэхтэһиилэр бэйэбитигэр буолаллара, дьон-сэргэ сүргэтин олус көтөҕөллөрө.

Саатар көҥүл тустууга Н.Н. Тарскай, хапсаҕайга П.Е. Алексеевы чөмпүйэнээттэрин ыыталлара буоллар, сунтаардар төһө эрэ астынар, үөрэр-көтөр этилэр. Бэрт өрдөөҕүтэ ыытыллан тураллар. Инникитин Сахабыт сирин успуордун салайааччылара Сунтаары аһара көйгөтүппэттэрэ буоллар бэрт этэ. Ханнык да успуорт көрүҥүн күрэхтэһиитэ көрөөччүлээх, ыалдьааччылаах буоллаҕына – кыттааччыны өрө кынаттыыр, спорт маассабай буоларыгар көҕүлүүр буоллаҕа.

Сунтаар суола билигин уруккута буолбатах, федеральнай суол сыллата тупсар.

Борис НИКОЛАЕВ, суруналыыс.