Лутраки-2023: Дьиктилээх сыыппара тугу тосхойор?

Греция Лутраки куоратыгар спортивнай тустууга бэтэрээннэргэ аан дойду чемпионата ыытылла турар. Санатан эттэххэ, тустуу – саастарынан араарыллыбыт 5 бөлөххө алталыы ыйааһыҥҥа ыытыллар. Бастакы күн икки бөлөххө кыайыылаахтар быһаарылыннылар.

Россияннар чемпионакка «Индивидуальный нейтральный атлет» диэн, биирдиилээн кытталлар, ол аата, дойдуларын былааҕа, гимнэ суох.

Бу түһүлгэҕэ Саха сириттэн – 2022 сыл республика бастыҥ хапсаҕайдыта, көҥүл тустууга бэтэрээннэргэ Россия чемпиона Александр Румин соҕотоҕун кыттар. Кини Д дивизиоҥҥа (51-56 саастаахтарга) 100 киилэҕэ тустар. Манна кыттааччылар 13-лэр, биһиги бөҕөспүт сэрэбиэйгэ 13-с киһинэн сылдьар. Дьэ, бу дьиктилээх сыыппара тугу тосхойор?

Сэрэбиэй быһыытынан Александр күрэхтэһиини финал чиэппэриттэн саҕалыыр. Ол аата, бастаан – Саудовскай Аравия уонна Япония бөҕөстөрүн киирсиилэрин кыайыылааҕын кытта тустар. Кини бөлөҕөр уонна уопсайынан бу ыйааһыҥҥа, бу ченмпионакка саамай улахан ситиһиилээх тустуук – икки тегуллээх олимпийскай чемпион, аан дойду икки, Европа биэс төгүллээх чемпиона 51 саастаах Эльдари Куртанидзены (Грузия) чорботуохха сөп. Аатырбыт бөҕөс уоскуйар диэни билбэккэ, аны бэтэрээннэр чемпионаттарыгар ситиһиилээхтик кыттыбыта хаһыс да сыла.

Ханныгын да иһин, биһиги бэйэбит бөҕөспүтүгэр ыалдьабыт уонна сэмээр Эллада дойдутуттан үчүгэй сонуну кэтэһэбит!

Петр ПАВЛОВ.