Сонуннар

Александр Крылов турнира: Тываттан кимнээх кытталларый?

Эрдэ иһитиннэрбиппит курдук, алтынньы 14-15 күннэригэр «Өрөгөй» Спорка бэлэмнэнии киинигэр Александр Крылов кэриэһигэр көҥүл тустууга Бүтүн Россиятааҕы иккис турнир ыытыллар. Бу түһүлгэ састааба син былырыыҥҥытын курдук күүстээх буолара күүтүллэр. Россия араас регионнарыттан тустууктар кэлэллэр.

Дьиэлээхтэртэн, ини биир Алексей, Петр Копыловтар, Александр Авелов, Олег Фомин, Константин Капрынов, Никита Хабаров, уо.д.а. күүстээхтэр кытталлар.

Онтон Тыва Республикатыттан сэттэ бөҕөс кэллэ: Амир Чамзын (57 кг), Кежик Седен, Иван Санчи-Мидип (61 кг), Эзир Тюлюш, Кежик Чымба (65 кг), Сайын Казырык (70 кг) уонна Айдын Монгуш (125 кг). Көрбүккүт курдук, бары да тустуу эйгэтигэр биллэр бөҕөстөр.

Спорт маастара Амир Чамзын (хаартыскаҕа) аҕыйах хонуктааҕыта Кызылга ыытыллыбыт Россия Сэбилэниилээх күүстэрин министрэ Шойгу кубогар норуоттар икки ардыларынааҕы турнирга ситиһиилээхтик тустан бастаабыта. Финалга иранеһы 10:0 ахсаанынан ыраастык кыайбыта. Кини уолаттарга уонна эдэрдэргэ Россия күрэхтэһиитин хас да төгүллээх призера.

Санатан эттэххэ, былырыын А.Крылов турнирыгар бастаабыттара: 57 кг – Алексей Копылов (Саха сирэ), 61 кг – Алексей Чебодаев, 65 кг – Усман Шахгириев (иккиэн – Красноярскайтан), 70 кг – Сайын Казырык (Тыва), 74 кг – Евгений Жербаев (Бурятия), 79 кг – Дмитрий Зайнидинов, 86 кг – Азрет Улимбашев (иккиэн – Красноярскайтан), 92 кг – Аюр Нимаев (Бурятия), 97 кг – Максим Толмачев, 125 кг – Никита Хабаров (иккиэн – Саха сирэ). Сүрүн бириис (1 мөлүйүөн уу харчы) хаһаайынынан Дмитрий Зайнидинов буолбута.

Тустуу сарсын, алтынньы 14 күнүгэр субуотаҕа, программа быһыытынан 10:00 чаастан саҕаланар.

“Дьулурҕан”.    

Добавить комментарий

Ваш адрес email не будет опубликован. Обязательные поля помечены *

176508
Бүгүн : 74