Лев Павлов финалга таҕыста

Бүгүн, Россия көҥүл тустууга чемпионатын бүтэһик, бэһис күнэ. Алта олимпийскай ыйааһыҥҥа кыайыылаахтары билиэхпит.

Онтон бэҕэһээ киэһэ уонна бөөлүүн түүн бэрт сытыы, тыҥааһыннаах киирсиилэр буоллулар. Онуоха талааннаах, элбэҕи эрэнэ кэтэһэр тустуукпут Лев Павлов сэргэхситтэ. Соторутааҕыта аҕай Грознайга (Чечня) ыытыллыбыт Россия 21-гэр диэри саастаах бөҕөстөрүн күрэхтэһиитигэр ситиһиилээхтик кыттан баран, кыратык тыын ыла түһээт, аны улахан дьоҥҥо Россия чемпионатыгар бэйэтин күүһүн холоһор. Уонна, төһө да салгыы тустарын үрдүнэн эттэххэ, үчүгэй көрдөрүүнү ситистэ. Этэргэ дылы, ылбыт тэтимин быспакка, сэниэлээхтик, кимиилээхтик, хорсуннук киирсэ сылдьар.

Ол курдук, Лев Павлов бастаан сэрэбиэй быһыытынан финал 16/1-гэр бэйэтин киһитэ Уйгулаан Иванову 4:0, финал 8/1-гэр тувинец Аяндай Ондары 6:2, финал чиэппэригэр тувинец Начын Монгуһу +2:2 уонна финалга тахсыыга дагестанец Муса Мехтихановы 2:1 ахсааннарынан кыайталаата.

Начын Монгуштуун тустуутугар, хапсыһыы бүтэрэ олох аҕыйах сөкүүндэ иннинэ 0:2 ахсаанынан хотторон иһэн, утарсааччытын кууһан ылан «кочерга» диэн албаска түбэһиннэрэн, ахсааны тэҥнээтэ (2:2) уонна кылбар кыайыыны ситистэ. Манна Лев тоҕоостоох кэмҥэ кыл түгэнэ тобула охсон албастаан, кыайыыга дьулуурун көрдөрдө. Онтон финалга тахсар иһин хабыр киирсиигэ, этэргэ дылы, хахай хаанын киллэрэн, толлон-самнан хаалбакка, утарсааччытын уоҕун самнаран, быраабыла быһыытынан кыайыылааҕынан ааттанна. Манна уолбут дьэ кырдьык, бөҕөс быһыытынан буһан-хатан, түһүлгэ күүрээнин тулуйан, өй-санаа өттүнэн ситэн эрэрин көрдөрдө.

Лев финалга утарсааччыта дагестанец Ахмед Идрисов туһунан эттэххэ, сааһа 24-дэ. Улахан көбүөргэ тустар үөрүйэхтээх бөҕөс. Россия чемпионатын икки төгүллээх призера, Иван Ярыгин аатынан турнирга хаста да миэстэлэспитэ. Дьокуускайга хаста да кэлэн тустубута, эриэ-дэхси көрдөрүүлэммитэ.

Ханнык да түгэҥҥэ биһиги бэйэбит бөҕөспүтүгэр Лев Павловка ыалдьабыт, кини кыайарыгар олус баҕарабыт! Лев кытаат, өрөйөн-чөрөйөн биэр. Били, гитаранан ыллыырыҥ курдук, бар дьонун санаатын көтөх, үөрт!

Бэҕэһээҥҥи тустуу түмүгүнэн биһигиттэн «санааны уоскутар» бөлөххө Уйгулаан Иванов (57 кг) уонна Иннокентий Бабаранов (74 кг) кыттыахтара.

Уйгулаан Иванов тувин Аяндай Ондары кытта киирсиэҕэ. Бу хапсыһыы кыайыылааҕа салгыы күрэхтэһиигэ Начын Монгуштуун тустуоҕа. Онно хайалара хоппут, чемпионат боруонса мэтээлин иһин Муса Мехтихановы кытта күөн көрсүө. Онтон Иннокентий Бабаранов – чечен Джохар Джабаевтыын тустуоҕа.

Онтон атын уолаттарбыт хайдах туһуннулар диир буоллахха, ол туһунан аныгыскыга сырдатыахпыт.

Бүгүн бастакы миэстэни былдьаһыахтара:

57 кг Лев Павлов (Саха сирэ) – Ахмед Идрисов (Дагестан)

65 кг Шамиль Мамедов (Москва) – Абасгаджи Магомедов (Дагестан)

74 кг Магома Дибиргаджиев (Дагестан) – Анзор Закуев (КБР, Крым)

86 кг Ибрагим Кадиев (Дагестан) – Малик Шаваев (КБР, Крым)

97 кг Абдулрашид Садулаев – Алихан Жабраилов (иккиэн Дагестан)

125 кг Абдулла Курбанов – Шамиль Мусаев (иккиэн Дагестан).

Бүгүн Дьокуускай бириэмэтинэн киэһэ 17:00 чаастан «уоскутар» бөлөх тустуулара саҕаланар. Түүн 23:30 чаастан үһүс бириистээх миэстэлэр иһин хапсыһыылар, онтон 02:00 чаастан саҕалаан кыайыылаахтары быһаарар бүтэһик киирсиилэр ыытыллаллар. Хаһан баҕарар буоларыныы, уолаттарбытыгар ыалдьабыт. Ситиһиилээх тустууну баҕарабыт!

Чемпионат хаамыытын күннэтэ көтүппэккэ “Дьулурҕан” сайтыгар, ютуб каналыгар, телеграмҥа страницатыгар сырдатан иһэбит. Онон кэтээн көрө, ааҕа сылдьаргытыгар ыҥырабыт.

Петр ПАВЛОВ.