Тустуу бүттэ. Тустуу салҕанар!

Бүгүҥҥүттэн, балаҕан ыйын 24 күнүттэн Кытай Ханчжоу куоратыгар Азия дойдуларын XIX сайыҥҥы спортивнай оонньуулара саҕаланна. Бу улахан таһымнаах күрэхтэһии алтынньы 8 күнүгэр диэри ыытыллыа. Оонньууларга 45 дойдуттан спортсменнар мустан спорт 40 көрүҥэр күөн көрсүөхтэрэ.

Көҥүл тустууга күрэхтэһии бырагыраама быһыытынан алтынньы 6-7 күннэригэр буолуоҕа. Хапсыһыылар алта олимпийскай ыйааһыҥҥа – 57, 65, 74, 86, 97, 125 кг ыытыллыахтара. Барыллааһын сайаапкаттан көрдөххө, састаап син күүстээх буолара күүтүллэр.

Ол курдук, Ирантан Рахман Амузад Халили, Хассан Яздани, Амир Заре курдук соторутааҕыта Белградка буолбут аан дойду чемпионатыгар ситиһиилээхтик кыттыбыт бөҕөстөр, Бахрейнтан аан дойду чемпионатын арыйыытынан буолбут Ахмед Тажудинов, Казахстантан аан дойду чемпионатын призера Азамат Даулетбеков, Кыргызстантан биһиги бөҕөспүт Айаал Лазарев, Японияттан Тошихиро Хасегава, Каики Ямагучи, Индияттан Бажранг Пуниа, Монголияттан Тумур Очир Тулга уо.д.а. биллиилээх тустууктар сайаапкаҕа бааллар.

Онон тустууну таптааччылар уоскуйбаппыт. Аан дойду чемпионата бүттэ. Азия тустуута саҕаланар.

«Дьулурҕан».