Сонуннар

Борис Борисов сырдык аатыгар…

В.П. Керемясов аатынан Дьокуускай куорат 3 №-дээх спортивнай оскуолатын саалатыгар көҥүл тустууга ССРС спордун маастара Борис Борисов сырдык аатыгар уолаттарга уонна улахан дьоҥҥо республикатааҕы турнир ыытыллан түмүктэннэ.

Борис Борисов (1960) Уус Алдаҥҥа, Бороҕоҥҥо төрөөбүтэ. Албан аатырбыт Чурапчытааҕы спортивнай интернат-оскуолаҕа үөрэммитэ, үтүөлээх тренер Д.П. Коркин иитиллээччитэ. Көҥүл тустууга Советскай Союз спордун маастара. Бэйэтин кэмигэр республика биир күүстээх тустууга этэ. Университекка үөрэнэр сылларыгар ордук тахсыылаахтык тустубута, Саха сирин 1981 с. чемпионатыгар 68 кг Анатолий Константинов кэнниттэн иккис миэстэлэммитэ. Итинтэн ыла 68 уонна 74 кг ыйааһыннарга эриэ-дэхси ситиһиилэммитэ. Республика 1984-1985 сс. чемпиона. Ити сылларга СГУ хамаандата республикаҕа бастыырыгар бэйэтин дьоһун кылаатын киллэрбитэ. 1984 сыллаахха Россия студеннарга чемпионатыгар бастаабыта, салгыы студеннар ССРС-ка бастыыр иһин чемпионаттарыгар иккис буолбута.

Олохтон хомолтолоохтук 2007 сыллаахха барбыта. Борис Борисович ситэ олорботох олоҕун кини икки уола, сиэннэрэ салгыыллар.

Кини аатын кэриэстээн Дьокуускай куорат тустууга федерацията сылын ахсын күрэхтэһии тэрийэр. Онно Б.Б. Борисов дьиэ кэргэттэрэ күүс-көмө, өйөбүл буолаллар. Быйылгы түһүлгэҕэ Борис туста сылдьыбыт ыйааһыннарыгар улахан дьоҥҥо хапсыһыылар ыытылыннылар. Ол курдук, Борисовтар ааттарыттан бастаабыттар 30, иккис буолбуттар 20, үһүстээбиттэр 10 тыһ. солк харчынан наҕараадаланнылар.

Уолаттарга кыайыылаахтарынан буоллулар: 32 кг – Валера Диодоров, 35 кг – Эрлан Федосеев (иккиэн – Чурапчы), 38 кг – Артём Новиков (Хатас), 41 кг – Влас Афанасьев (Мэҥэ Хаҥалас), 44 кг – Ариан Винокуров, 48 кг – Ньургун Чемезов (иккиэн – ДЮСШ-3), 52 кг – Никифор Семенов, 57 кг – Арылхан Кононов (иккиэн – Чурапчы), 62 кг – Альберт Монастырев (ДЮСШ-3), 68 кг – Пана Софронеев (Бүлүү), 75 кг – Андрей Николаев (Мэҥэ Хаҥалас).

Улахан дьоҥҥо: 68 кг 1. Игорь Матвеев (ОЭУ), 2. Степан Охлопков, 3. Дмитрий Илларионов, Петр Парников (үһүөн – ХИФУ). 74 кг Константин Капрынов (ХИФУ), 2. Кирилл Мордовской (Чурапчы), 3. Албан Аввакумов, Вальтер Владимиров (иккиэн – ХИФУ).

«Дьулурҕан».

Добавить комментарий

Ваш адрес email не будет опубликован. Обязательные поля помечены *

160245
Бүгүн : 145