Иитэр, өйдөтөр суолталаах бэртээхэй таһаарыы

Н.Е. Мординов – Амма Аччыгыйын аатынан «Кэскил» оҕо бэчээтин кыһата «Бэлэм буол» сурунаалын балаҕан ыйынааҕы нүөмэригэр ССРС, РСФСР, Саха АССР үтүөлээх тренерэ, Саха сирин үтүөлээх учуутала Дмитрий Петрович Коркин төрөөбүтэ 95 сылыгар анаан сыһыарыы быһыытынан икки өртүлээх биһиги сүдү киһибит туһунан өҥнөөх плакаты бэчээттээн таһаарда. Кээмэйэ улахан, А3.

Плакат «Коркинныы олоруохха. Коркинныы айыахха» диэн инники сирэйигэр Дмитрий Петрович олоҕун кэрчиктэрэ, Саха Республикатын президеннэрэ М.Е. Николаев уонна В.А. Штыров сыанабыллара, Чурапчы спортивнай интернат-оскуолатын иитиллээччилэрин ситиһиилэрэ бэчээттэммит. Онтон иккис, «Коркин уолаттара» диэн сирэйигэр Дмитрий Петрович олимпиецтар Роман Дмитриев, Павел Пинигин, Александр Иванов, номоххо киирбит Николай Захаров – Сахаачча, Вячеслав Карпов тустар ньымаларын, характердары туһунан сыанабыла болҕомтону тардар. Итиэннэ Д.П. Коркин иитэр, такайар ньыматыттан кылгас түгэннэр хаартысканан быһаарыллан бэриллибиттэр. Быһата, бэртээхэй таһаарыы буолбут!

Анал сыһыарыы Д.П. Коркин аатынан Чурапчытааҕы спортивнай Албан аат түмэлин матырыйаалларыгар олоҕуран бэчээттэммит буолан, сыыппаралара-чахчылара барыта итэҕэтиилээх, оруннаах. Сүбэһитинэн түмэл научнай сотруднига А.П. Спиридонова буолбута махталлаах.

Бу анал плакаты илиибэр тутан олорон уруккуну санаатым. Оҕо сылдьан биһиги саҕана хас биирдии үөрэнээччи дьиэтигэр анал муннуктаах буолара. Мин оронум үрдүгэр истиэнэҕэ нэдиэлэтээҕи уруоктарым, куруһуоктарым расписаниетын таһынан хаһыаттан кырыйан ылан тустууктар, Роман Дмитриевтээх, Павел Пинигиннээх хаартыскаларын сыһыарар этим. Ол син биир, били таҥараһыттарга үҥэр-сүктэр иконаларын курдук, этэргэ дылы, күннэтэ сырдыкка, үтүөҕэ, кэрэҕэ угуйа турдаҕа. Онтукам сааһыары саһаран, эбиитин сииктээх истиэнэҕэ сыстан хаалан буортутуйан, ол хомойуута буолара.

Ол саҕана ити «Кэскиллэр» курдук үчүгэй хаачыстыбалаах, өҥнөөх постердар да, плакаттар даҕаны суохтара. Көр, спорка, туох эмэ атын эйгэҕэ да буоллун, таптал итинник үөскүүр. Онтон сылтаан бэйэм спорду сырдатар киһи буолан таҕыстым.

Билигин оҕолор биһиги олимпиецтарбытын билиэхтээхтэр. Онон «Бэлэм буол» бу 9 №-дээх сурунаалын тустуунан дьарыктанар оҕолор ылан, Д.П. Коркин туһунан анал сыһыарыыттан билиилэрин-көрүүлэрин хаҥаталларыгар, истиэнэҕэ сыһыаран күннэтэ көрө сылдьалларыгар баҕарабын. Онуоха бастатан туран төрөппүттэр көҕүлээн күүс-көмө, өйөбүл буолалларыгар эрэл улахан. Манна сыһыары тутан эттэххэ, эһиил саас сахаттан бастакы олимпийскай чемпион Роман Дмитриев төрөөбүтэ 75 сыла буолар. Бу бэлиэ түгэҥҥэ сөп түбэһиннэрэн кэскиллэр бу бырайыагы салҕаан, кини туһунан маннык плакат оҥороллоро буоллар.

Сурунаалы Бэчээт дьиэтин «Кэскил» редакциятыттан, 213 кабинеттан ыйыталаһыаххытын сөп.

Петр ПАВЛОВ.