Албаннар бэйэлэрин бириистэрин олохтоотулар

Бэтэрээн-маастардарга аан дойду икки төгүллээх чемпиона, ССРС тыатын сирин спортсменнарын 2, Саха сирин 7 төгүллээх кыайыылааҕа, ССРС, РСФСР, Саха АССР спортарын маастара, республика үтүөлээх тренерэ Анатолий Николаевич Константинов төрөөбүтэ 70 сылыгар анаан Суоттуга (Уус Алдан) ахсынньы 22 күнүгэр көҥүл тустууга республикатааҕы таһымнаах турнир тэриллэр.

Күрэхтэһии, Анатолий Константинов бэйэтэ туста сылдьыбыт ыйааһыннарыгар – 62, 68, 74 кг ыытыллар.

Дьэ бу, Анатолий Николаевич кэриэһигэр турнирга – республикаҕа биллэр, спорду таптааччылар “Албан” фан-кулууптарын чилиэннэрэ харчы хомуйсан, анал бириис олохтоотулар: сахалыы кыыннаах быһах уонна сиэдэрэй оҥоһуулаах кубок. Бу бириис түһүлгэ биир бастыҥ бөҕөһүгэр туттарыллыа.

Түһүлгэ программата:

10:30 – А.Н. Константиновка аналлаах музей аһыллыыта,

11:00 – барыллааһын хапсыһыылар.

12:30 – турниры үөрүүлээхтик аһыы.

13:00 – күрэхтэһии салгыыта.

17:00 – быһаарыылаах тустуулар.

18:00 – хапсаҕайга муҥутуур кыайыылааҕы быһаарар түһүлгэ.

19:00 – кыайыылаахтары наҕараадалааһын.

“Дьулурҕан”.